4 Sngi Hadien lap ïa ka met u samla ba shah rong ha ka wah sharum ka jingkieng Byrnihat

Nongpoh, Nailar 30: Da ka jingtrei shitom ka kynhun SDRF na Assam bad ki Pulit ka Sonapur ha ryngkat ka jingïarap ki trai shnong mynta ka sngi la lap noh ïa ka met u samla ba shah rong ha ka wah na 15mer, kaba dei hadien ba la dap 4 sngi lynter ba la ïa wad ïa ka met utei u samla uba la hap kyrsan shawah ha ka jingleit shabar ha jan ing jong u.
Ban pynkynmaw, une u samla ba la shah rong ha ka um sha ka wah, u dei uba la tip kyrteng kum u Rohithas Chaudry, 27 snem ka rta, ha kaba kane ka jingjia ba sngewsih ka la jia ha ka miet jong ka 27 tarik u Nailar 2025, kaba u la hap sha ka wan ba la shah rong noh ha ka umsaw na ka jingheh um palat katei ka wah.
Haba lum jingtip halor kane ka jingjia, la ong kiba haïing hasem, ki nongshong shnong naduh katei ka miet kaba la hap sha ka wha, ki la pynlong ïa ka jingwad paidbah ha shi lynter katei ka wah, hynrei wat hapdeng ka jingtrei shitom ban ïa wad bad kim lap satia ïa ka met jong une u Samla.
La ong ruh ba dei haduh mynta ka sngi, na ka jingbteng ka jingïawad paidbah bad ryngkat ka jingdon lang ka kynhun SDRF na Assam bad ki Pulit na Sonpur Police Station kiba la trei shitom ban wad ïa ka met une u saml bad hadien ba la dap mynta la 4 sngi ba u la shah rong ha ka um la lap noh ïa ka met jong u sha rum ka wah Umtrew na Byrnihat ba ka um ka la rong shaduh ki bynta ba la hap biang sha u pud u sam ka Assam.
Shuh shuh, la ong ruh ba hadien ba la lap ïa ka met jong une u samla, ki Pulit ka Sonapur ki la pynlong ïa ka jingtohkit kaba bniah bad pyndep ruh katkum ki kyndon jong ka aiñ bad hadien kata la aiti noh ïa ka met jong u sha kiba haïing hasem ban pyndep noh ïa ka jingleh burom ba khatduh ïa ka met ba dang sah jong u.