Shillong, Ïaïong 25: Ki saw ngut ki rangïalehkai Muaythai ka Jylla ba kynthup ïa u samla Pynnehbor Mylliemngap, Blaseibok Kharbuli, Mightyson Nonglang bad u Skhemborlang Marweiñ kin sa leit ban mihkhmat ïa ka ri India sha ka lympung ïalehkai Muay Thai World Championship kaban long ha Abu Dhabi, UAE naduh ka 26 tarik Jymmang haduh 4 tarik Jylliew 2022.
Kine ki samla hapoh ka jingïalam u Bah Angelina Sun uba dei u President jong ka Muay Thai Association of Meghalaya ha kajuh ka por u referee bad Bah Pynsuklang Sumer kin mih nala ka jong ka Jylla ha ka 25 tarik Jymmang.
Haba pynbna ïa kane ka jingleit ïashim bynta ha katei ka World Championship ha Shillong Press Club ha ka sngi Nyngkong ka 25 tarik Ïaïong na ka liang u Bah Angelus Sun u la ïathuh ba ïa kine ki saw ngut la jied na ka jinglah ka jong ki ban ïalehkai bha ha ka Muay Thai National Championhsip kaba la long ha Imphal ha u Nohprah 2021.
U la ïathuh ba ka association kala ïakynduh ruh ïa u Myntri ki kam ïalehkai ka Jylla ban pan jingïarap ha kaba ïadei bad ka pisa tyngka bad sngewkmen ruh ba na ka liang u Myntri u la kular ban ai jingïarap ïa ka association lyngba ka tnad sports ba ka association kala buh hakhmat kaba kot sha ka 6 lak tyngka. U la kyntu ruh ïa ki paidbah ba kin ailem ka jingkyrshan ban ïarap na bynta jong ki khamtam ha ka liang ka pisa tyngka khnang ba ka jingleit ïashim bynta jong ki ha katei ka championship kan long kaba jop.
U Pynehbor Mylliemngap un ïakhun ha ka kyrdan 48kg (elite), Blseibok Kharbuli 48kg (U-23 male), u Mightyson Nonglang ha ka kyrdan 45kg (U-23 male) bad u samla Skhemborlang Marweiñ ha ka kyrdan 54kg (U-23 male).
