Nongpoh, Risaw 15: Ki Pulit ka Ri Bhoi ha ka jingïalam u Senior Superintendent of Police u V.S Rathore ryngkat u Additional SP u Bah O. Massar lem bad kiwei kiwei ki pulit na Nongpoh, ha ka janmiet jong ka sngi Baar ki la dang bteng ban khynra naphang ïa ki Kali ba pynkheiñ ain bad bun ki ki Kali ba pynkheiñ ain ki la shah dain kuna naphang khlem jingmap ha ki Pulit.
Ïa kane ka jingkhynra la pynlong ha Mawdiangum ba hap ha ka surokbah National Highway-6 ha Ri Bhoi District, ha kaba ki Pulit ki la khynra naphang ïa ki Kali ha baroh ar tylli ki surok fourlane ban ban tohkit ïa ki kali ba pynkheiñ aiñ.
Kumba la lap ne sakhi, kiba bun ki Kali kiba la shah dain kuna ki dei ki Kali kiba u dribar u la dih kyiad bad buaid, ki kali bym do ki kot ki sla, ki kali ba pyndait ïa ki light ba la khang bad kiwei kiwei ki bynta ka jingpynkheiñ aiñ.
Kane ka jinglah ban pynthikna ïa ki dribar la buaid ruh ki pulit ki pyndonkam da ka machine (Breath analyzer) ban tip haduh katno ki la dih kyiad bad kito kiba la kot 30 percent shaneng ka jingdih kyiad kim lait satia na ka kuna.
Kumba la ïathuh ruh da ki heh pulit ka Ri Bhoi, tang hynnin ka janmiet jong ka jingkhynra Kali ki la oih ban dain kuna haduh T. 4 lak na ki Kali ba pynkheiñ aiñ bad la leh ïa kane ruh ka long ban wan rah ïa ka jingsngaiñ ki paidbah ba leit ba wan na kane ka surokbah ba bun ki jingjia ba sngewsih ki la jia bad da kaba pyrkhing kumne kane kan pynduna ïa ki jingjia ba sngewsih bad ruh ka long kum ka jinghikai ïa ki Dribar kiba ju pynkheiñ ain haba niah Kali ne kit ïa ki nongleit nongwan.
