4 lak pynbna u Chairman ka Regional Committee ban ïarap ïa ka longïing ba khlad ka kmie ha shnong Jashiar

Mawkyrwat, Jylliew 17: Ka sorkar Meghalaya lyngba ka Regional Committee (RC) ba la lam khmat da u bah Renikton Lyngdoh Tongkhar kum u Chairman jong ka West, South West bad Eastern West Khasi Hills District u ba dei ruh u Myntri ka tnad umbam umdih jong ka Sorkar jylla mynta ka sngi ka 17 tarik u Jylliew, 2022 u la pynbna ban ai jingïarap pisa sha kawei ka longïing hapoh shnong Jashiar, South West Khasi Hills District.
Katkum ka jingïathuh jong u bah Renik la ong ba kane ka jingïarap ne relief kaba kot haduh T. 4/- lak tyngka bad ïa kane la mang kyrpang ïa ka longïing jong ka kong (L) Hailsentinari Marweiñ, 25 snem kaba la duh ei noh ïa ka mynsiem briew na ka daw jong ka jingtwa khyndew ha ka shiteng jong ka 16 tarik u Jylliew, 2022 ha ka por kumba 12:30 ei ei.
U bah Renikton Lyngdoh Tongkhar kum u Chairman jong ka komiti haba kren ha ka jingïalang ba lyngkot u la pynpaw ba da ka mynsiem jong ka jingsngewlem, ka jingsngewkhia bad jingsngewsynei na ka bynta kane ka longïing kaba la mad ïa kum kane ka jingjia ba ki la duh noh ïa la ka jong ka kmie ha ka shi khyllip mat ha kaba kane ka la long ka jingduh nong kaba khraw khamtam eh ïa ki khun ki kti. “Kine ki jingjia kim dei ki jingjia ba shu jia ryngkhat hynrei U Blei hi u la buh ne bynta ïa ka jingim jong ngi ki briew bad ngim dei ban sngewphylla ïa kata”, ong u bah Renik.
Hooid! ha ka jinglong briew hi ngi don ka jingïam ne sngewsih kthang namar ka jingduh noh ïa kiba ieit ba thoiñ hynrei kyrmen skhem ba U Blei Trai Kynrad na jrong Un nym ieh noh ïa ki khun ki kti, ïa u lok bad kumjuh ruh ïa kiba ha ïing ha sem baroh hynrei Un ïai pyntngen bad ïai don lem bad ki ha ka jingim jong ki kaba manla ka sngi.
“Ngam sngewlah ngeit haba nga la leit ban peit ïa ka jaka ba twa ne shah rong ka ïing, hynrei kine baroh ki dei ki jingbuh beit buh ryntih da U Nongthaw”, ong u bah Renik. U la ong ruh ka jingwan jong ki mynta ka sngi ban sngewlem halor kane ka jingjia ka dei ruh shibynta ban pynbna ban ai jingïarap kaba la mang kyrpang na ka Sorkar.
Kumta u la buh ka jingkyrpad ïa ka District Administration ba kan sa leh bad pynbit pynbiang ïa ki jingdonkam baroh khnang ba kane ka jingïarap lyngba ka sorkar ka dei ban poi ha kane ka longïing.
Ha kajuh ka por u la pynpaw ruh ka jingkhublei na ka bynta ka shnong ka thaw, kiba ïa dei jingdei baroh bad kane ka longïing kaba don ka jingjia ba sngewsih ha kaba ki la ïarap sngewlem ha kum kane ka por ba donkam eh namar da ka jingïatreilang yn lah ban leh ïa kiei kiei baroh.
Ha kane ka sngi la ïa donlang ruh ka Deputy Commissioner, South West Khasi Hills District, kong C. Kharkongngor, IAS lem bad u Superintendent of Police, South West Khasi Hills District, bah B.J. Laloo, MPS, u Deputy Superintendent of Police, South West Khasi Hills District, bah W.L. Nongpluh bad kumjuh ruh kiwei ki ophisar sorkar.