Jowai, Naitung 18: Ka lyngpung ïalehkai phubol jong ka kyrdan 3rd Division 2025 League Stage, bala pynïaid daka East Jaiñtia Hills District Football Association (EJHDFA), kala poi sha ka Round-16 mynta ka sngi 18 tarik ha madan Artificial Turf Diengshynrum, Khliehriat East Jaiñtia Hills District.
Haka jingïakhun kaba nyngkong ka Youngstar SSC Huroi kala jop da ka jingïashut Tie Breaker da 4-2 kol ïaka Tuber Shohshrieh SC. Haba phai sha ka jingïakhun hapoh ka por kila ïakhaid da mar shikol (1-1). Ïa ka kol na ka Youngsters SSC Huroi la thep da u Wallamborlang Lamin Gadew haka minit ba 30. Ïa ka kol na ka Tuber Shohshrieh SC la thep da u Ribait Bang haka minit ba 77.
Ha ka jingïakhun kaba ar ka Narwan SC kala jop da 2-1 kol ïa ka Tongseng YSC, ïa ki kol na ka Narwan SC la thep da u Miki Suiam ha ka minit ba 18 bad u Thomas Langstang haka minit ba 72. Katba ïaka shikol na ka Tongseng YSC la kum thep bakla da u Deibormi Shadap (OG) haka minit ba 70.
Lyngba kane ka jingjop jong ka Youngster SCC Huroi bad ka Narwan SC kila ïoh ban rung sha ka Quarter Final jong kane ka lympung 3rd Division.
La pyntip ba ka jingïakhun kan bteng biang lashai ka sngi 19 tarik ha ki ar tylli ki jingïakhun.
