Shillong, Jylliew 02 : Ka sorkar pdeng ka la pyllait ïa ka song pisa kaba 391 klur tyngka na ka bynta ban siew noh ïa ka bai tiar kaba pyndonkam da ki Village Employment Council (VEC) ha ka jingpyntrei ïa ka skim 100 sngi kaba la sahteng khlem siew mynta la katto katne snem.
“Shen ngin sa pyllait noh ïa ka pisa sha ki VEC bapher bapher. Bun ki la phone ïanga naduh u BDO haduh ki VEC halor ka pisa bai material kaba phim pat ïoh haduh mynta. Na ka liang ka sorkar pdeng dang shen ka la dep ban pyllait 391 klur tyngka,” ong u Myntri ka tnad C&RD, Bah Hamlet Dohling haba kren kum u Kongsan ha ka jingïalang jong ka tnad ha Umphrew ha kane ka sngi Palei.
Nalorkata u la pyntip ruh ba ha shwa kane ka 391 klur ka sorkar pdeng ka la dep ruh ban pyllait teng 49 klur.
“Kumta lada kynthup lang bad kumba 70 klur tyngka ei ei na ka bhah jong ka sorkar jylla, ngin ïoh ban pyllait kumba 450 klur tyngka sha ki Block bapher bapher kaba dei tang ka bai material,” bynrap shuh shuh u Myntri.
Shwa kane, u Myntri u la ong ruh ba bun bha ki la pyntip ba ki shem jynjar haduh katta katta ban pyntyllun ïa ka kam jong ka skim 100 sngi na ka daw ba ki slem ban ïoh ïa ka bai tiar.
U Bah Hamlet u la ong ruh ba ka jingslem ban ïoh ïa ka bai tiar ka la pynlong bun ïa ki VEC ban sdang kyrngah ban bteng pyntrei ïa ka skim 100 sngi.
