Shillong,Jylliew 26 : Kumba 38 tylli ki surok kiba la la shah pynjulor jur ha ka jingtwa bad shah rong ha ka um na ka jingther u lapbah bad shlei um ha ka jylla ha kine ki khyndiat sngi ba la dep. Kine ki dei kiba la dkut ka leit ka wan bad hap ban shna kyrkieh ban lah biang ki kali ban ïaid na kine ki surok. Kine ki kynthup ïa ki surok ba pynïasoh na kawei ka shnong sha kawei pat, ki surok bah ( National Highway, ki surok ba pynïasoh na kawei ka district sha kawei pat bad ter ter.
Kiba bun na kine ki surok kiba shah pynjulor ki dei ha East Jaintia Hills, South Garo Hills bad South West Garo Hills. Ka surok bah NH 62 kaba pynïasoh naduh Rongdong shaduh Baghmara lyngba ka Siju ka la julor jur bad kan shim por bha ban lah ban pynkhuid ïa ki jingtwa ha shilynter katei ka surok. Nalor kane ka NH6 kaba hajan Lumshnong ruh ka dei kawei na ki surok ba la julor jur bha.
U Myntri Rangbah bad u Nongïalam ka Liang Pyrshah ki la leit jurip sha kine ki jaka ba jur palat ka jingtwa. U Myntri Rangbah u la ïaid da ka kjat naduh Siju Dabakkol shaduh Rongdong ban leit jngoh bad ïa kynduh ïaki long ïing kiba shah ktah. Nangta u la leit urip ruh ïa katei ka surok NH62 da kaba shu ïaid kjat. U la leit jngoh ruh ïaka jingsdang ban pynkhuid ïa ka surok da ka tnad PWD na Nongalbibra shaduh Siju. U la bthah ïa ki bor synshar district ba kin peit ba ki paidbah kim dei ban iap thngan.
Bun ruh ki jingkieng kiba la shah rong ha ka umsaw, kum ka jingkieng ha Damalgre Mellim Boldamgre ka la shah rong ha ka umsaw tangba la sdang ban shna mynta. Ha kiwei kiwei ki jaka kum ha Adugre shaduh Purakhasi, Siju Telegre ruh la sdang ban shna mynta.U Myntri Rangbah ula bthah ïaka tnad PWD ban trei shitom ban lah pyndep kloi ïa ki surok khnang ba ka leit ka wan ki paidbah kan suk. Ha katei ka sngi ba u leit jurip sha kitei ki jaka ula bam jamiet ruh ha surok hapoh ka kali jongu bad ka dei ka ja ba la song ban leit ai sha kito ki shem lanot.
Na ka liang u Myntri Rangbah ula pan jingiarap shwa 300 klur na ka sorkar pdeng ban ïoh pynsted ïa ki jingsyrdep biang ïa kine kiba la shah pynjulor palat.
