Shillong, Risaw, 09: Da ka jingtrei shitom ban khanglad ïa ki kam be-aiñ ha shilynter ka khappud Indo-Bangladesh ha ka sngi Baar ki shipai BSF jong ka 4th battalion ryngkat ka jingïatreilang bad ki Pulit ka Jylla Meghalaya ki la ïoh kurup 35 tylli ki masi na khappud jong ka East Khasi Hills.
Ïa ki masi la ïoh kurup na kawei ka jaka khlaw kaba don hajan khappud ïa kiba la thmu ban khaii tuh sha Bangladesh. Ïa kine ki masi ba la ïoh kurup la aiti noh sha ki Pulit ban leh ïa kaba donkam katkum ki kyndon jong ka aiñ.
Ha kawei pat ka jingkhynra jong ki Pulit ka Meghalaya bad ki BSF ki la ïoh kurup palat 9,000 hajar kilo ka shini ba la ieh ha kawei ka ïingjah hajan khappud ïa kaba thmu ban khaii ruh sha ka ri Bangladesh na khappud jong ka South Garo Hills.
Ïa ka shini ba la ïoh kurup la aiti noh sha ki Pulit jong ka Rongra PS ban leh ïa kaba donkam katkum ki kyndon jong ka aiñ.
