35 ngut kiba iap, 6.34 lak kiba shah ktah ha ki 950 tylli ki shnong

Shillong,Jylliew 25 : Ha ka jingther u lapbah bad lyngshop ki bor mariang ha baroh 11 tylli ki District jongka jylla ha kine ki khyndiat sngi ba la dep ki la don 35 ngut ki mynsiem briew kiba la duh ïa ka jingim na ka jingshah rong ha ka umsaw, shah ban ha ka jingtwa khyndew, ki ïing ki sem. Nalor kine kiba iap ki briew kiba la shah ktah ha kane ka jinglyngshop ki bor mariang da ka jingshlei um bad jingtwa ki la long haduh 6,34,818 lak ngut bad ki shnong pat kiba la shah pynjulor jur ki long 950 tylli.
Kat kum ka kaiphod kaba la pyllait na ka ophis u Myntri Rangbah ka jylla u Conrad K Sangma la ïathuh ba kiba dang jah rngai haduh mynta ki long 11 ngut bad kiba mynsaw jur ki long 22 ngut.
Ki ïing kiba la shah pynjulor ki long 4385 tylli,265 kiba la shah pynjulor phom,3870 kiba shah pynjulor mar shiteng bad 98 tylli kiba la jur bha ka jingshah pynjulor.
Ki mrad kiba iap ha kane ka jingthwa bad shlei um ki long 310 tylli. Ki briew kiba la ïoh ban pyllait im ki long 21 ngut, ki ïing sherdara kiba la pynkhreh lypa ki long 31 tylli, ki briew kiba hap ban pynsah ha kine ki ïing ki long 4885 ngut. La sam ïaki jingïarap kum ki jaiñ ki nep, ki mar bam mar dih, ki umdih bad ter ter sha ki lanot shlei um. Ki lyngkha bad jaka rep ba la shah pynjulor ki long da ki bun spah hectares.
Bun ki surok kiba la shah pynjulor jur na ka jingtwa kat haduh bym lait shuh ka leit ka wan, ki jingkieng kiba shah rong ruhki don bun tylli, ki skul bad ter ter. Ka sorkar ka la hap ruh ban pan jingïarap na ki shipai suiñ ban leit pynhap marbam sha South Garo Hills namar ym don surok shuh ba lait ban ïaid sha katei ka district. Nalor kane wat ki BSF ruh ki la ïarap bha ïa kito ki paid nongshong shnong kiba sah ha khappud.
Ka sorkar mynta ka dang lum jingkheiñ thik pa thik ban tip haduh katno spah klur ka jinglut khnang ba kan ïoh ban pan jingïarap shuh shuh na ka sorkar. Na ka liang u Myntri Rangbah ula pan 300 klur tyngka hynrei la sngewthuh ba kane kam pat dap satia bad yn dang hap ban pan shuh shuh na ka sorkar pdeng.