Shillong, Jymmang, 31: Kiba bun na ki samla kiba la pyndep ïa ki jingpule ha ki kyrdan bapher bapher ki la shu shong khlem kam khlem jam na ka daw ka jingbym ïohkam ïohjam bad na ka daw ka jingbym pynlong shuh ka Sorkar ïa ki eksamin thungkam.
Katkum ka jingwad jingtip da u nongwad RTI bapaw ha ka jylla u Bah Disparsing Rani lyngba ka jubab Right to Information na ki tnat treikam bapher bapher jong ka Sorkar Jylla, la lap ba haduh mynta ki don haduh 3367 hajar tylli post kiba shu sah thylli ïa kiba ki tnat treikam jong ka Sorkar Jylla kim pat aiti satia sha ki District Selection Committee (DSC) bad sha ka Meghalaya Public Service Commission (MPSC) na ka bynta ban pynlong ïa ki eksamin thungkam.
Ha ka sngi Baar u Bah Disparsing Rani u la pyntip paidbah ba ki dang don sa 290 tylli ki Post kiba lait thylli ha ki tnat treikam bapherbapher jong ka Sorkar Jylla ïa kiba la lap lyngba ka jubab RTI kaba u dang shu ïoh pdiang dang shen.
Katkum ka jingïathuh jong u Bah Rani ha ka jingïakren bad ki lad pathai khubor, ki kam kiba lait thylli ha ki tnat treikam ki long 19 tylli ha ka ophis jong u District Forest Officer (Wildlife) ka West bad East Garo Hills District, 14 tylli ha ka Directorate of Tourism, 94 tylli ha ka ophis u Commissioner of Taxes, Shillong, 20 tylli ha ka ophis u Executive Engineer ka tnat PWD (Roads), Barangapara Division, 5 tylli ha ka ophis jong u Executive Engineer ka tnat PWD (Roads), Nongpoh Division, iwei ha ka ophis jong u Executive Engineer ka tnat PWD (Roads), Resubelpara, iwei ha ka ophis jong u Superintendent Engineer ka tnat PWD (Building), Shillong, 2 tylli ha ka ophis jong u Executive Engineer ka tnat PWD (Roads), Jowai, 63 tylli ha ka Directorate of Land Records & Survey, 14 tylli ha ka ophis jong u District Health and Medical Officer jong ka Nongpoh bad 39 tylli ha ka ophis jong u District Health and Medical Officer, Shilong bad 18 tylli ha ka ophis jong u Medical Superintendent ka Civil Hospital Khliehriat.
“Ha Secretariat ki don 119 tylli ki post kiba dang lait thylli bad nga la pan jingtip da ka RTI ban tip don aiu ha lyndet ka jingbym pat pyndap ïa kine ki post kiba dang sah thylli,” u la ong.
Shuh shuh u la ïathuh ba u la pan jingtip da ka RTI ha kaba ïadei bad ki Deparmental Promotion Committee (DPC) .
Ka jingbthah jong ka Ingbishar High Court ïa ka Sorkar Jylla ban pyntreikam ïa ka Roster System ha ka Bhah Thungkam kan long ka jingmyntoi ïa kiba bun ki nongthep kam khamtam ïa ki briew kiba don jingduna ha ki dkhotmet.
“Naduh u snem 2010 ter ter haduh mynta hapoh ka ophis jong ka tnat ïalehkai sports kam shym la don shuh ka jingpynrungkam ïa ki samla kiba la paw ha ki jingïalehkai sports,” u la ong.
“Ka Roster System kan long ka jingmyntoi ïa ki nongwadkam,” u la bynrap.
“Nga la ïoh ïa ka jingujor ba kam shym la don satia ka jingthungkam kaba beit bad kaba ryntih. Wat ha Secretariat ruh la ïohi ïa ki durkhmat kiba thymmai ki bym ithuh ithaw. Kata ka la pynkhia ïa ka mynsiem jong nga. Ka jingpyntreikam ka Roster System la i kumba ka la plie lad ban thung Contract bad Officiate. Haduh mynta kam pat don ka Circular ba la phah sha ki tnat treikam bapher bapher,” la kam u Bah Rani.
U la kynnoh ruh kiba ïoh kam ïohjam dei tang ki briew kiba don ka jingïadei bad ki briew kiba don ha ka por katba kiba duk bad ki don biang ka ïoh ka kot ki hap ban shu trei ïa ki kam barit baria.
