Shillong, Jylliew 18: U Myntri Khynnah ka sorkar Pdeng uba khmih ïa ka tnat Coal and Mines u Satish Chandra Dubey u la ong ba ka PM-Kisan Samman Nidhi scheme ka pyni ïa ka jingïaibteng jong u Myntri Rangbahduh ka ri u Narendra Modi ban ïarap ïa ki nongrep bad ka bha ka miat jong ki, ïa kane u la ong hapoh ka jingïalang kaba la long ha Umïam, Meghalaya ha ka sngi baar.
Haba kren ha ka prokram kaba la long ha ICAR, Umïam ban pyni ïa ka jingpyllait pisa jong u PM Narendra Modi lyngba ka jingkren halor ka instalment kaba thymmai jong ka PM Kisan Samman Nidhi, u Dubey u la ong ba kumba T. 20,000 klur ynsa sam sha ki 9 klur 26 lak ngut ki nongïoh myntoi ha kylleng ka ri. U Myntri u la ong ba kane ka instalment kaba T 33.86 klur yn sa sam hapdeng ki 1,20,815 ngut ki nongrep ka Meghalaya. Haduh mynta T. 432.36 klur la dep ban phah sha ki bank account jong ki 1,46,758 ngut ki nongrep ka Meghalaya, ong u Myntri khynnah ka sorkar pdeng.
Haba ïathuh ba ka PM Kisan Samman Nidhi ka dei kawei na ki nuksa bapher ba la shimkhia da u PM sha ki nongrep, u Dubey u la pynkynmaw ba ïa kane ka skhim la pyllait paidbah da u Myntri Rangbahduh ka ri u Narendra Modi ha u snem 2019 bad la don ka kaiphot kaba don ka jingkheiñ ba kumba 11 klur ngut ki nongrep ki la ïoh jingmyntoi ha ka first phase.
U Myntri u la ïoh ruh ban ïasyllok bad ki nongrep ha kaba u la batai ruh halor ka jingpynkloi ka jingphah ïa ka fund napoh ka PM KISAN scheme bad u la kyntu ïa ki bor badei khmih ban weng ïa kino kino ki jingeh ba la mad da ki nongrep. U Myntri u la sam ruh ïa ki tiar kum ki sprayer, pump bad automated weeding machine sha ki nongïoh myntoi.
Ha kane ka sngi u Myntri Rangbahduh ka ri u Narendra Modi u la pyllait ïa ka 17th instalment kaba T. 20,000 klur kaba hapoh ka PM-KISAN bad u la sam ïa ki syrnot sha palat 30,000 tylli ki self-help group ba la tip kum ka Krishi Sakhis ha Varanasi.
Kiba la donlang ki long u Lat ka Uttar Pradesh, ka Anandiben Patel, u Myntri Rangbah ka Uttar Pradesh u Yogi Adityanath, u Union Agriculture Minister u Shivraj Singh Chouhan bad kiwei pat ki Myntri jong ki jylla.
