Mawkyrwat, K’lyngkot 22: Kum shibynta ban pyntyllun ïa ki kam pynroi hapoh jong ka dong ka thaiñ Ranikor, u bah Pius Marweiñ kum u nongmihkhmat hapoh jong ka Ranikor Constituency ha kine ki khyndiat sngi u la ïoh ban sam ïa ki work order kaba dei na ka MDC Scheme ha ki lai tylli ki shnong bad haba kheiñ ïa ka pisa ka la poi haduh 32 lak tyngka.
Lah ban kdew ba ki lai tylli ki shnong ki ban sa ïoh jingmyntoi lyngba ka MDC Scheme ki long ka Dirang, ka Nongkalong bad ka Nongnah kiba hapoh hapoh jong ka Ranikor Civil Sub Division, South West Khasi Hills District.
Ha kane ka jingsam ïa ki work order ka long, ha ka shnong Dirang ka kot haduh T. 10/- lak ban tei ïa ki Dorbar Hall, ha shnong Nongkalong ka jingkheiñ pisa ka la poi sha ka T. 12/- lak kane ka kynthup ban tei ïa ka Dorbar Hall jong ka shnong, kawei pat ka work order ba la sam ka dei ha Nongnah bad ha ka jingkhein pisa kaba long T. 10/- lak na ka bynta ban pynpoi um ha ki shnong kiba kyrduh palat ka um bam um dih.
Kum ban shu pynkynmaw ha kaba ïa dei bad ka um um dih hapoh shnong Nongnah kaba dei ka shnong kaba jynjar bha ban ïoh ïa ka um, kumta ha u snem ba la dep na ka liang jong u MLA ka thaiñ u la ai T. 20/- lak ban pynpoi um ha kine ki shnong hynrei namar ka jngai palat ki tlong um kaba kot da ki phew kilometres na ka tlong um haduh ban poi ha ki shnong kumta kane ka pisa T. 20/- lak kam shem la lah ban pynpoi um. Namarkata, u MLA/MDC ka thaiñ u la hap ban ai biang sa T. 10/- lak khnang ba ki paidbah jong ka shnong kin da ïoh syndon ïa ka um kaba paka bad ba pahuh pahai katkum ki jingdonkam jong ki.
