Shillong, Nailur 07: Hadien ka jingshah rem kaba jur ha ka jingïalehkai kaba nyngkong, ka kynhun ki thei ïalehkai phutbol jong ka Meghalaya ki la mad biang ïa ka nam rem kaba ar sien lynter ha ka lympung ïalehkai jong ka 30th Senior Women’s National Football Championship na ka bynta ka Rajmata Jijabai Trophy 2025-26, ha kaba ki la liem noh da 2-1 kol ha ka Sikkim hynne ka sngi Nyngkong.
Ka Sikkim ka la pynskhem ïa ka jingkyrmen ban khur ïa ka jingjop da kaba lamkhmat 2 kol ha ka kylla step. Baroh ar tylli ki kol la thep da ka Simran Gurung (39 & 43’), ha kaba ka la ïoh syndon ban khur ïa ka nam Player of the Match.
Ka Inrila I-dor Khongthaw kaba la mih bujli ha jaka jong ka Marbarin Nongrum ha ki minit pynjlan shuwa ban kut ka kylla step, ka la ïoh ban pynphai shi kol na ka bynta ka Jylla ha ka minit kaba 64 jong ka kylla miet.
Haba phaidien, ka Meghalaya ka la sdang ïa ka jingïalehkai jong ka na ka Group D da ka jingshah rem kaba jur, haduh 7 kol ha ka West Bengal.
Kane ka kynhun ki thei ïalehkai ka jylla ba la ïalam da u Kitbor Kharkongor kan ïakhun pyrshah sa ïa ka Railways lashai ka sngi Balang (10-09-2025) ha ka por 9 baje mynstep.
