300 klur pan u CM na Delhi yn pyrshang ban maramot kloi ïa ki surok ba twa

Jowai, Jylliew 19 : U Myntri Rangbah ka jylla u Conrad K Sangma ula ïathuh mynta ka sngi ba u la pan jingïarap 300 klur tyngka na ka sorkar pdeng na ka bynta ban maramot biang ïa kine ki jingshah pynjulor ha ka jingwan lyngshop u lapbah ha kane ka jylla ha kine ki khyndiat sngi ba la dep.
Haba ïakren bad ki lad pathai khubor hadien ba lla dep jurip ïa ka surok NH-6 kaba twa bad khyllem ha Lumshnong, East Jaintia Hills u Myntri Rangbah u la ïathuh “ Nga la ai jingthoh sha u Myntri Kam Pohïing ka ri u Amit Shah ban ïarap ïa ka jylla 300 klur tyngka na ka bynta ban maramot ïa kine ki jingshah pynjulor ha ki bor mariang. Na ka liang u Amit Shah ym tang ba u la phone ïa nga ha ka 18 tarik por janmiet hynrei ula kular ruh ban shim khia ban ïarap ïa ka jylla da kaba un sa phah shen ïa ki briew jongka srokar pdeng ban wan jurip ïa kine ki jingshah pynjot bad shah pynjulor ha u lapbah ha kane ka jylla”.
U la ïathuh ruh ha ki lad pathai khubor ba lyngba kane ka pisa yn ïoh ban ïarap ïa ki nongrep kiba la shah pynjulor ki jaka rep jaka riang, jingthung jingtep jongki, ban shna ïa ki surok ki lynti syngkien ba la shah pynjulor bad pyntwa, ki jingkieng ba la shah rong bad shah pynjulor ha ka umsaw, ki iing skul kiba la julor, ki longïing kiba la shah pynjulor ki ïing bad duh ki mynsiem briew bad ter ter.
Ha ka Lah Sngi U Blei u Myntri Rangbah un hiar ban jurip sa sha Mawsynram ban peit da lade ïa ki jingshah pynjulor ha katei ka thaiñ bad ban ïakynduh ruh ïa kiba haïing jong kito kiba la duh ei ïa la ka jong ka jingim bad ha ka Sngi Ba ar un sa hiar sa sha Ri Lum Garo ban leit jurip ïa ki jaka ba la shah ktah jur. Hadien kane ynda u la wan phai un sa pynkheh ïa ka kaiphod ban ai ha ki briew jongka sorkar pdeng ki ban wan sha ka jylla bad ban phah kopi ruh sha u myntri kam pohïing ka ri u Amit Shah.
U la ong ruh ba ym shym la poi pyrkhat ba une u lapbah un jur haduh katne katne mynta u snem uba la neh lynter kumba 6 sngi ei ei bad ka long ka sien ba nyngkong ban ïoh mad ïa kum une u lap bah hadien 40 snem. Dei na kane ka daw ba la jur eh u slap ba sa jur ki jingjulor ha ka jylla khamtam ki surok bad ki jingkieng.
U la ïathuh, kiba bun ki surok hangne ha Ri Lum Khasi bad Jaintia bad kumjuh ruh ha Ri Lum Garo ki la shah ktah jur bad dkut na ka jingtwa bad hap ban pynsangeh ia ka ïaid ka ïeng ki kali.
Ka long da shisha ka jingeh kaba khraw ïa ka sorkar hynrei wat la katta ruh yn pyrshang katba lah ban pynsted ïa ka jingmaramot ïa ki surok khnang ban ïoh ïaid kloi ki kali. Ha kane ka jingleit jurip sha East Jaintia Hills la synran lang ïa u da u Myntri Kam Pohïing ka jylla u ma Lahkmen Rymbui ba la ïadon lang u MLA ma Shilang Pale, DC, SP, ki Engineer ka PWD bad NHAI.
Ka jingdkut jong kane ka surok NH 6 ha Lumshnong ka la ktah ïa ka leit ka wan sha ki jylla ba marjan kata naduh ka Assam, Mizoram bad Tripura. Palat shihajar tylli ki trok bad ki bus ki la sahkut ha katei ka thaiñ. Kumba long mynta la shah ban ïaid tang ki kali rit na kawei pat ka ruok ka ban ïaid lyngba ka karkhana jongka Star Cement. U Myntri Rangbah ula sngap ruh ïa ka jingud jingnam jong ki nongniah trok kiba la ïa kynduh jingeh bad u la bthah ïa ki bor synshar district ban pynbiang bam ïa ki.
“ Ngin pyrshang katba lah ban pynsted ïa ka jingmaramot bad kyrmen skhem ruh hapoh ka 24 kynta yn sa lah ban pynïaid ïa ki kali rit kata ruh ka shong ha ka jinglong jingman ka suiñbneng. Ngi kyrmen ba u slap un sangeh noh khnang ban ioh shna kloi ia katei ka jingshah pynjulor bad lada ïoh ban trei beit lehse hadien 48-72 kynta ki kali kit marbam ruh ki la lah ban ïoh ïaid” ong u Myntri Rangbah.
U la pynlong ruh ïa ka jingïalang bad ki bor synshar District bad ki ophisar jong ki tnad bapher bapher ha DC ophis ban ïoh bishar bniah shuh shuh ïa ki jingshah pynjulor bad ula kyntu ïa ki bor synshar district bad ki tnad sorkar ba kin ïatrei lang ban peit ba ki jingtrei kin ïai sted khnang ban ym ïa kynduh jingeh than ki paidbah.