30 tarik yn kyntang Bishop ïa u Fr. Bernard Laloo, yn sakhi lang u Nongmihkhmat jong u Pope

Shillong, Lber 24 : Ka jingpynkyntang Bishop ïa u Rev. Fr. Bernard Laloo kan long ha kane ka sngi u Blei, ka 30tarik Lber 2025 ha Madan Kalbari jong ia u kan long ha ka 30 tarik u Lber 2025 ha Madan Kalbari Cathedral Parish Laitumkhrah.
Kumban shu pynkynmaw, dei ha ka 08tarik u Rymphang mynta u snem u Pope Francis u la thung ïa u Rev. Fr. Bernard kum u Auxiliary Bishop jong ka Jylla Niambah Shillong.
Kum ka jingpynkhreh na ka bynta kane ka jingpyntang Bishop kaban long ha ka 30tarik, na ka liang ki dkhot jong ka Episcopal Ordination Committee ba kynthup ïa u Fr. Gerald Khongjee bad Bah Bedarius Shylla haba kren bad ki lad pathai khubor ha Shillong Press Club ki la ïathuh ruh ba ha kane ka sngi yn sa don lang ruh naduh u Nongmihkhmat jong u Pope Francis sha India bad Nepal, u Most Reverend Leopoldo Girelli nalor ki Bishop jong ka thain shatei lam-mihngi jong ka Ri na ki 15 tylli ki Jylla Niam nalor ki Lyngdoh bad ki riewniam.
La pyntip ruh ba ka jingkyntang Bishop kan sdang da ka Mass Bakhuid ha ka por 10:00 baje mynstep bad ha ka por 1:30baje nohphai sngi kan don ka Jingmane Sakramen bad hadien kane pat kan sa don ka prokram leh burom ïa u Bishop thymmai.
Shwa kane, ki la ïathuh ruh ba u Rev. Fr. Bernard u dei u khun khatduh na ki 11 ngut ki khun jong i Kong Auila Imai Laloo bad Bah Pius Prel Shabong (Bam Kwai ha Dwar u Blei).
La kha ïa u Fr. Bernard ha ka 16 tarik u Jylliew 1976 ha ka shnong Laitlyngkot. U la pyndep ïa ka kyrdan pule BA Honours ha ka Political Science ha u snem 1999, Bachelor of Education ha u snem 2007, MA Sociology ha u snem 2009, Post Graduate Diploma in Councelling ha u snem 2016. U dei ruh u nongthaw jingrwai niam uba tbit, u nognthohkot bad ula pynmih ruh katto katne tylli ki phlim Khasi kum ka ‘Synshar Ka Jot’ bad ‘Hato shano kan ïalam’.
La pynkyntang Lyngdoh Sohblei ïa u Fr.Bernard ha ka 30 tarik u Ïaïong 2006 ha Parish Laitlyngkot . Hadien ka jingpynkyntang Sohblei u la trei kum u Lyngdoh Synrop ha St.Paul Parish, Upper Shillong ha u snem 2006 bad 2007, u la long kum u Administrator ha Christ King College ha u snem 2008, u Prefect of Studies ha St.Paul’s Apostolic School Upper Shillong ha u snem 2009 haduh 2015.
U la bat ruh kum u Principal jong ka Divine Savior Higher Secondary School Laitumkhrah ha u snem 2016, u Director jong ka Social Service Center Shillong naduh u snem 2017 haduh 2021, u Board Member jong ka Caritas India naduh u snem 2021 haduh 2024, Parish Priest jong ka Cathedral Parish , Laitumkhrah naduh u snem 2022 haduh mynta bad u dei ruh u Chancellor jong ka Jylla Niambah Shillong.
Ha kajuh ka por la bynbeit ruh ïa ki jaka pynieng kali na ka bynta kito ki kali ba wan na ka Jylla Niam Nongstoin, Jowai bad kiwei ki jylla na ka thain shatei lam-mihngi jong ka Ri.
La pyntip ba na bynta ki kali kiba wan na ki thain Jowai bad kiwei ki jaka ba wan na kajuh ka surok la pynbeit ba ka jaka pynieng kali kan long ha – Madan Nongthymmai; St. Edmund’s School bad College campus; Holy Cross Broke Dene Campus; Shi liang na ka surok ban leit sha Fruit Garden; Don Bosco Technical School, Laitumkhrah; Don Bosco Mini Stadium ,Laitumkhrah; STC Campus : Anton Hall, Laitukhrah; St. Mary’s Campus, St. Margaret’s Campus; Nirmali Convent; Holy Cross Convent, Christ King College, Laitumkhrah, bad shiliang jong ka surok ban leit sha ka jaka ieng kali ha Upper Colony, bad sha DSEL.
Na bynta ki kali kiba wan na ka thain West Khasi Hills bad Ri Bhoi la pynbeit ba kin ieng ha -Shiliang na ka surok All India Radio; shiliang ka surok Lower Lachumiere; shi liang ka surok Hydari park lynter shaduh Seven Set School; Shilliang ka surok bah National Highway ha Barik point, shi liang surok na MBOSE ophis shaduh MPSC office; Ka jaka ieng kali ha Loreto School, nadien ka Christ King College, Hopkinson’s Road; bad ha Madan Malki.