Nongstoiñ, Jymmang 27: Ki khynnah skul kiba na ka St.Joseph Higher Secondary School Nongkasen Eastern West Khasi Hills District, kaba dei ruh ka skul kaba la ïoh ban khur ïa ka nam lahduh ha ka 1st Eastern West Khasi Hills District Level Inter School Athletic Meet 2022, kin ïoh ban mih khmat sha ka State Level Chief Minister Inter School Athletic Meet 2022, ïa ka ba yn sa pynlong ha S.A.I Nehu Campus Mawkynroh, ka ban sdang noh shen naduh ka 31 tarik u Jymmang haduh ka 2 tarik u Jylliew 2022.
Na katei ka skul ki don kumba 31 ngut ki khynnah kiba la sdang ban kilan met mynta ban mih madan na ka bynta ka District bad kiba dei ruh kiba la khur bun tylli ki takma Ksiar, Rupa bad Rnong bad napdeng jong ki, ka Isakyrsiew Lyngdoh Peiñlang ka dei kaba la ïoh khur haduh 3 tylli ki Takma Ksiar.
Ha ka jingïakren bad ki nongpynïaid jong katei ka skul ki la pynpaw da kaba ki la ong ba wat hapdeng ka jingther u lapbah lapsan bad ka jingïoh por ban kilan met tang ar sngi. Pynban kim shym la poi pyrkhat ba kin sa ïoh ïa kane ka burom ka ban thaw History shi syndon ha ka District kaba thymmai.
