30 haduh 40% sdang kiew ka jingwan ki bar jylla bad mynder ha Jaiñtia Hills, ong ka KSU

Shillong, Nohprah 10: Ka Khasi Student’s Union West Jaiñtia Hills District ka la pynpaw ïa ka jingpyrshah kaba jur halor ka jingthmu jong ka North East Frontier Railway ban wanrah ïa ka lynti rel sha ka thaiñ Jaiñtia Hills khamtam da ka jingwan leh jurip ne survey sha kane ka thaiñ ba kynthup ruh ban pynpoi haduh Sor Jowai.
Haba kren sha ki lad pathai khubor ha ka sngi Balang ki nongïalam ka seng ba kynthup ïa u President u Bah Laitphar Syngkrem bad u General Secretary u Bah Lening Tariang ki la ong ba watba mynta bym pat don ka lynti rel bad tang da ka jingwan jong ki kali, ka jingkiew ki bar jylla bad ki mynder hapoh Jaiñtia Hills ka la poi sha ka 30 haduh 40%, kumta katno kan long kaba shyrkhei pat lada ka wan sa ka rel.
“Ngi pyrshah jur ïa kane ka jingwan survey jong ka NFR ïa ki artylli ki jaka jong ka thaiñ Jaiñtia Hills kaba dei sha ka thaiñ Khliehriat bad sor Jowai bad ka seng kumba ka la pynpaw naduh mynshwa ba ka pyrshah ïa ka lynti rel kumta haduh mynta ruh kam pat lah ban pdiang ïa kane, la ka dei kaba kit mar bam ne kit briew namar ngi sngewthuh ba kan wanrah ïa ka jingwan rung kyrthlep jong ki mynder ri sha kane ka thaiñ,” ong kitei ki nongïalam.
Ka seng ka maham ruh ïa ka sorkar ba kam dei ban kynshoit ban wanrah lynti rel hynrei ka dei ban wanrah noh ki aiñ bad balei ka sorkar ka buhrieh ïa ka ILP bad shano ka MRSSA bad balei ym pynbiang ïa ki kyndon aiñ, kumta ka KSU ka ïeng skhem beit ban pyrshah ïa ka jingthmu jong ka NFR.
“Wat kwah ba ka thma kan khie ha West Jaiñtia Hills bad lada ka sorkar ka leh da ka bor ka KSU ka la long kaba la khreh ban leh da kano kano ka lynti khnang ban pynim ïa ka jaitbynriew namar kiba bun hi ki nongshong shnong ka Jaiñtia ki pyrshah jur ïa ka jingthmu ban wanrah lynti rel, tang katto katne ki riew shimet ba shim kabu kiba kwah ban wanrah lynti rel namar ka myntoi shimet jong ki,” ong KSU.
Ka la pynpaw ruh ba ki mynder ri bad ki bar jylla ki wan nyngkong tang ban bylla sngi, hynrei ki la neh da kaba sah lyngba ki nongaikam, ki kontraktor, ki katto katne ki nongshong shnong, ki nongpynïaid shnong kiba pynbiang ïa ki kot ki sla jong ki, bad ki don ruh kiba wan buh bad seng dukan, hynrei ki trai shnong hi pat ki ïada ïa ki.
“Lada ki dorbar shnong ne ki bor pynïaid shnong ki kloi ban pyrkhing na ka liang ka seng ka kloi ban ïatreilang da kaba buh ki kyndon kiba skhem ban pyrkhing ïa ki bar jylla,” pynpaw ka seng da kaba pynpaw ïa ka jingbynñiaw bad wat ïa ki kam misteri ruh la shah knieh noh ha ki bar jylla, shano ka jaitbynriew kan leit lada ym donkam ym donjam shuh.
Ka seng ka pynpaw ruh ka jinglynngoh ba ha ka por ba khynra mynder ka ju lap ba ki bar jylla ki ju don ki kot ki sla na kiba bun ki shnong kumta ka kyrpad ïa ki Dorbar Shnong bad ka Synjuk ki Rangbah Shnong ba kin shimkhia bha halor kane ka kam.