SHILLONG, Lber 21: Ka Meghalaya State Kickboxing Association [MSKA] ha ka 20 tarik u Lber (sngi Palei) ka la pynkup burom ïa ki 12 ngut ki samla kynthei bad shynrang kiba na ka Team Revolution hadien ba ki la wanrah nam bad burom ïa ka Jylla da kaba tyngshaiñ ha ka lympung ïakhun jong ka “Kickboxing India League Pro Open National” ha West Bengal.
kane ka lympung kaba hap hapoh ka jingpeit jong ka WAKO India Kickboxing Federation, la pynlong ha City Center Mall, Siliguri, West Bengal bad la sdang ïa ka naduh ka 17 tarik haduh 19 tarik u Lber, 2025. Ki kyrdan ïakhun (event) ki kynthup ïa ka Low Kick, Full Contact bad Kl.
Ha kaba kut jong kane ka lympung lai ngut ki samla khasi ki la ïoh khur ïa ka “Title Belt” ryngkat bad ka song pisa ba 15 hajar tyngka marwei, kiba kynthup ïa ka samla Daniella I Wanda Mylliemngap (kaba ïakhun ha ka 60 kg K1 Rules event) na Upper Lumparing Lumdorbar, Shillong, u samla Juh Pa U Juh Nongtdu (- 61 kg K1 rules event) na Nartiang bad u samla Fedrick Khongsit (- 54 kg Full Contact event) na Laitkor Nongdaneng.
Nalor kitei lai ngut ka Careen Judy Kharkamni (ba ïakhun ha ka – 60 kg K1 Rules event), kaba shong ba sah ha Laitkor Nongdaneng bad kaba pule ha Women’s College ryngkat bad ka samla Ibankyntiew Iangrai (ba ïakhun ha ka- 48 kgs Low Kick event) ba shong ba sah ha Mawdiangdiang bad kaba dang pule Class X ha Pine Mount HS, ki la wan ha ka kyrdan ba ar (runner-up).
Ka kynhun kaba la ïalam da u General Secretary u Fourwell Khongmalai bad u Coach Bah Bantiplang Khongwir na ka Meghalaya State Kickboxing Association, ki la ai khublei ïa ki nongjop bad kyrmen skhem ba ha kawei ka sngi kin ïoh mihkhmat ïa ka ri India ha ki rynsan ïakhun Kickboxing ha ka pyrthei.
