3 tylli ki khusnam khur ka Meghalaya ha ka Digital Transformation Summit ha New Delhi

Shillong, Kyllalyngkot 19 : Ka Meghalaya ka la ïoh ban khur haduh lai tylli ki khusnam (National Award) ha ka 6 Digital Transformation Summit & Awards kaba long ha nongbah New Delhi. Kine ki khusnam ba ka ïoh ka dei ka jingïoh nam ha ka Geospatial Technology, Digital Governance bad Public Service Delivery.
Kane ka jingïoh khusnam jongka jylla ka pynpaw katno ka jylla ka la kiew ha ka liang ka techonology hapoh ka jingïalam jong u Myntri Rangbah ba mynta u Conrad K Sangma kumba u thrang ban kyntiew ïa ka jylla ha baroh ki liang.
Lyngba ka tnad Planning, Investment Promotion and Sustainable Development ïa ka Meghalaya la ithuh ha kata ka kyrdan “ Innovative Use of Digital Technology in Enhancing Public Service Delivery”.
Ka Meghalaya One ka dei ka platform jongka Digital kaba ïarap ïa ki nongshong shnong ban ïoh jingtip shaphang ki skhim, ki rukom pyntreikam bad kumjuh ruh ba kin ïoh ban ai kino kino ki jingujor lada don naduh ki shnong ha nongkyndong haduh ha sor.
Ka Meghalaya State GIS bad UAV Centre hapoh ka Meghalaya Basin Development Authority) MBDA) bad ka Planning , Investment Promotion bad Sustainable Development ki la ïoh ïa ka khusnam ha ka kyrdan “Excellence” ha ka jingpyndonkam ïa ka Geospatial Technology na ka bynta ka kit ka bah bad kiwei kiwei ki projek.
Ka National Health Mission (NHM) jongka tnad ka koit ka khiah jongka jylla ka la ïoh ïa ka khusnam ha ka kyrdan “Innovative Digital Health Service bad Public Health Data Analytics” Kane ruh ka la ïoh ïa ka khusnam Excellence lyngba ka MOTHER app. Naduh ba mih kane ka app naduh u snem 2020 haduh 2025 ka la don ka jinghiar haduh 60 % ka jingiap ki kmie ha ka por pun por kha bad 34% ki khyllung bad kane ka pyni ba kane ka app ka la ïarap da shisha ban pynsngewthuh ia kiba bun ba lang.