Shillong, Ïaiong 20: Ka Ïingkashari Meghalaya High Court hynne ka sngi balang, kala ailad lai taiew ïa ka Sorkar Jylla ba kan wanrah ïa ka roster system ban lah pyntreikam ïa ka bhah thungkam thungkam jong ka Jylla (Job Reservation Policy).
Haba shong bishar ïa ka Public Interest Litigation (PIL) halor kane ka kam, ka Kashari ba arngut ki Nongbishar bala khlieh da u Chie Justice Sanjib Banerjee kala ong “Ka Jylla kala pan katto katne por ban wanrah ïa ka roster system. Namar kata, ai ba ka jingbishar ïakane ka kam kan long biang hadien lai taiew”.
Ka Ïingkashari kala pynkynmaw ruh ïa ka Sorkar Jylla ba ka roster system ka iahap tang ha jingpynrung kam thym mai ïa ki briew (entry level post) satang lada ka bhah thungkam ka long ruh na ka bynta ka jingkiew kyrdan.
“Nalor kata, ban pynthikna ïa ki briew ba kumno ba dei ban thungkam, ka long kaba donkam ban buh ïa ka roster bad ban pyntreikam ruh ïa ka roster ha baroh ki entry-leven post naduh ka por ba pyntreikam nyngkong ïa ka bhah thungkam, kynthup ïa ki briew kiba la kha hadien ba treikam ka bhah thungkam” kala ong.
Haba kubur ba kan dei ka kam kaba khia bha ban leh ïa kane na ka bynta baroh ki entry-level post ha man ki Ophis Sorkar, kynthup ki shnat treikam ka Sorkar kiba pyntreikam ïa ka Reservation Policy, ka ïingkashari kala ong ba dei ban pyndep ïa kane ka kam hapoh ka artatiew naduh ba pynmih ïa kane ka hukum.
Ka Ïingkashari kala buh ban shong bishar biang ïa kane ka kam ha ka 11 tarik Jymmang.
