Shillong, Naitung, 31: Ka jingïakhih jong ka bynta kaba lai da ki sengbhalang bapher bapher jong ka Willamnagar ka la poi noh sha kaba kut ha ka 29 tarik mynta u bnai.
U President jong ka Garo Students Union (GSU) u Saljrang Tengrik Marak ha u kyrwoh u la ong, “wat hapdeng ki hynriew sngi ba la pynlong ïa ka jingpakhang ophis hynrei ka Sorkar lymne ki bor pynïaid jong ka MeECL kim shym la shah skhor satia. Namarkata, yn sa pynlong biang ïa ka jingïakhih tad haduh ban da ïoh ïa ka jingdawa bad ïa ka jingshim rai jong ka Sorkar bad ka tnat ba dei peit.”
Une u nongïalam ka GSU u la pyntip ba ka jingïalang jong ki Sengbhalang bapher bapher kaba la long ha Tura ha ka 30 tarik mynta u bnai ka la shim ïa ka rai ban bteng ïa ka jingpakhang ophis naduh ka 3 tarik haduh ka 5 tarik Nailar, 2022 bad ha kine ki lai sngi yn pynlong ruh ïa ka jingpakhang surok ha baroh kawei ka East Garo Hills.
Ki sengbhalang ki la dawa na ka sorkar bad na ka MeCEL ban ym pynlip ïa ka bording ha rilum Garo.
Ban sangeh noh ïa ka jingleh shiliang khmat ha kaba thung ïa ki Workman ha ka tnat Power. Ban kham pynbun ïa ki nongtrei ha rilum Garo ha ka ophis jong ka MeECL.
Ka jingdawa ka long ruh ban don ïa ka Backlog Recruitment ha rilum Garo kumba la pynlong ïa ka jingthungkam ha rilum Khasi ha u snem 2020 bad 2021.
Ban sangeh mardor ïa ka jingpynkynriah kam ïa ki nongtrei na rilum Garo sha rilum Khasi khlem da thung bujli.
Ki sengbhalang ki la dawa ba dei ban don ka Backlog Recruitment na ka bynta ki Garo ha ka Head Office jong ka MeECL kaba don ha Shillong.
