3 sngi lynter ai jinghikai ka IHM ïa ki trai ba ai ïing basa ban kyntiew ïa ki kam jngohkai pyrthei

Nongpoh, Nailar 09: Ka Institute of Hotel Management (IHM), Shillong ka la lah ban pynlong da kaba jop ïa ka prokram ai jinghikai shaphang ka kam jngohkai pyrthei kaba lai sngi lynter na ka bynta ki nongpynïaid ïa ki homestay na kylleng ka Ri Bhoi District jong ka jylla Meghalaya. Ïa kane ka jinghikai la pynlong da ka jingkyrshan jong ka Directorate of Tourism, ka sorkar Meghalaya.
Ha kane ka prokram ai jinghikai ki don kumba 52 ngut ki nongïashim bynta ha ka kynhun ba nyngkong jong kane ka prokram ai jinghikai, na ki shnong bad ki jaidbynriew bapher bapher hapoh ka District. Ka jingthmu jong kane ka prokram ka long ban nang pynbha ïa ka jingshakri hapdeng ki nongpynïaid ïa ki homestay, ban kyntiew ïaki kam jngohkai pyrthei wat sha ki thaiñ nongkyndong.
Ha kine ki lai sngi, ki nongïashim kila ioh ki jinghikai ba bñiah haki sobjek bapher bapher kiba iadei bad ki kam jngohkai pyrthei bad kumno ban pynïaid ïaki iing basa, ka khuid ka suba bad kumjuh ban pynïaid iew ïaki jingbam tynrai, ka jingshngaiñ ïaki nongwan sah bad ban hikai bad ki jingïarap haba don ki jingjia ba kyrkieh.
Kane ka jinghikai ka long ruh shibynta jong ka thong ka sorkar jylla ban pynkhlaiñ ïaki kam jngohkai pyrthei bad ban kyntiew ïaki trai shnong kiba pynïaid ïaki iing basa khnang ba ka lawei jong ka kam jngohkai pyrthei kan kiew shaphrang bad kan long ka lad kamai ïaki trai muluk.