3 sngi ïakynduh ki jylla NE ha Guwahati, buh thong ban ïakhun pyrshah ïa ka HIV hapoh u Nohprah

Shillong Rymphang 25: Ki doktor ba dei peit ïa ki State AIDS Control Societies na ki jylla bapher bapher jong kane ka thaiñ shatei lam mihngi ki la ïa kynduh lai sngi lynter ha nongbah Guwahati kaba sdang mynta ka sngi na ka bynta ban ïamir jingmut halor ka jingpang HIV kaba la kiew bha ha kane ka thaiñ. Ha kane ka jingïalang ki la buh thong ba kane ka thaiñ bad ka Ri hi baroh kawei kin ïakhun pyrshah ïa kane ka jingpang HIV kumno ba yn lah ban tehlakam ïa ka hapoh ka 1 Tarik u Nohprah 2027 kaba dei ka World AIDS Day, hapoh jongka Mission AIDS Suraksha, la ong u Additional Secretary bad NACO Director General u Dr Rakesh Gupta ha ka jingplie ïa ka jingïalang mynta ka Sngi Baar.
Ka jingïalang ha Guwahati, ka dei kaba nyngkong na ki 11 tylli ki jingïalang jongka Suraksha Sankalp Karyashalas kaba la thmu ban pynlong ha ka ri naduh u Rymphang haduh u Lber 2026, ka la lumlang ïa ki 60 tylli ki District kiba hakhmat eh jongki 7 tylli ki jylla ka thaiñ shatei lammihngi. Ka Meghalaya kala pynleit jingmut ha ka thain East Jaintia Hills, East Khasi Hills, Ri-Bhoi bad West Jaintia Hills ha kaba ki kynhun jong ki district ki dang trei ïa ki kam ban poi sha ka kyrdan jongka Surakshit Plus da kaba kynjoh sha ka thong: 95% ki briew kiba im bad ka jingpang HIV bad ka jingtip ïa ka jinglong jingman ka jongki, 95% na ki kiba don ha ka ART bad 99% kiba dei kito kiba la ïoh ia ka jingsumar.
“Ki jylla ka thaiñ shatei lam mihngi ki dei kiba la buh hakhmat eh, 60 na ki 219 tylli ki district kiba la buh hakhmat bha ki don hangne” ong u Gupta bad ka bynrap ba kane ka jingïalang ka dei ka jingsdang ïa ka jingpyrshang jong ka jingshimkhia kaba thikna, kaba pynleit jingmut ïa ka thaiñ , ki jingleh bad ki jingpynkhreh ïa ki rukom pyntrei ïa ki kam ki jam.
Ki ophisar ki dang khmih bniah ïa ka jingpyntreikam ïa ka NACP, ban khmih bniah ia ki Micro-Level Indicators, Local Epidemiology, ki jingduna bad ka jingpynkhreh ïa ka jingthaw ïa ka State Specific Corrective Plans. Ha kane ka jingïalang la wan ban ïashimbynta da ki Project Directors jongki State AIDS Control Societies bad kiwei kiwei ban ïatai halor ki mat ki bapher bapher ha kane ka jingïalang.
Ka sorkar ka la ong, ba kane ka jingïalang ka dei ban pynmih ïa ki buit treikam ha ki district ban pyntreikam ïa ka jingthrang ka ri ban pynduh noh ïa ka jingpang HIV/AIDS kum ka jingpang kaba buh ha ka jingma ïa ka koit ka khiah ki paidbah bad ban pynurlong ïa ka nongrim jongka Mission AIDS Suraksha.