Nongstoiñ, Lber 5: Naduh u bnai Ïaiong jong u snem 2022 jong ka jinghiar pynjot jong ki khñiang ïa ki jingthung kum u motor bad kiwei kiwei ha ka thaiñ Umyiap bad kiwei de ki jaka, na ka liang ki Nongrep bad ka Seng Nongrep HFU, ka la leit ïakynduh ïa u District Horticulture Officer ka West Khasi Hills.
Ha ka jingïakynduh ïa u DHO, u la phah lum thup ha ki Form bad ki Nongrep ki la leh kumta ban lum ki Nongrep man ki shnong. Pynban haduh mynta ki lad jingïarap kim pat long kam ei ei satia.
“Ha 29.2.2024 na ka liang jong ngi ka seng ki nongrep ka Hill Farmer Union West Khasi Hills District, ha ryngkat ki nongrep ka thaiñ Umyiap kiba dei ruh ki dkhot jong ngi, ngi la leit ïakynduh ïa u DC ka West Khasi Hills, ban kyrpad ban ïarap siew noh ïa ki bad na ka liang u DC u la kular ban ïarap ban leh ïa ka ba donkam. Kumta kum ka seng HFU ngi kyrmen ka Sorkar hapoh ka jingshimkhia lem jong u DC ban ïarap noh ïa ki nongrep lyngba ka Relief Fund ne kino kino ki lad jingïarap na ka sorkar”, ong u Bah Lumlang Kharsyiemlieh Secretary HFU West Khasi Hills.
