Shillong, Nailur 06: Wat lada ka BJP kadei ka Seng kaba ki paidbah jong ka jylla kim pat da pdiang bha, hynrei ha North Shillong kan dei ka Party kaba ïaknieh ticket ban ïakhun ha ka elekshon MLA 2023.
Katkum ki khubor ba la ïoh la ïathuh ba kin don haduh 3 ngut ki kyrtong ban ïaknieh ïakhun na kane Party na North Shillong Constituency, kaba kynthup ïa ka Mawkhar, Mission Compound, kumba lai powa ka Jaiaw. Nangta ka Wahingdoh, Riatsamthiah, Umsohsun, Lawmali, Mawlai Nongmali, Them ïew Mawlong (ba sah ki Harijan) Khyndailad, Oakland Road, Jail Road, Police Reserve bad kiwei kiwei.
Kine ki lai ngut ki long u Bah Martamlin Pyrbot, MDC barim jong ka Jaïaw, u Bah MH Kharkrang, u Ophisar Pulit ba dang shu shongthait dang ha ka 31 tarik u Nailar 2022 bad u Bah Michael Kharsyntiew, u Samla rangbah uba la treibha ha ka imlang sahlang.
Kine ki lai ngut kin hap ban ïakhun pyrshah ïa u Sitting MLA, u Bah Adelbert Nongrum u ban ïakhun na ka Voice of the People Party (VPP), u Bah Ransom Sutnga na ka Seng National Peoples Party (NPP), u Dr. Aman War u kyrtong jong ka United Democratic Party (UDP) i Samla Elgiva Rynjah jong ka Seng Trinamool Congress, Bah Kyrsoi Pyrtuh bad kiwei kiwei ruh ki kyrtong kiba lah ban mih hadien.
Napdeng kitei ki lai ngut kiba ïaknieh ticket na ka BJP, baroh lai ngut ki la ïaid ban ïakynduh ïa ki paidbah wat lada ym pat rai yn ai ïano ïa ka ticket.
Na ka liang ki nongïalam ka BJP Meghalaya State Unitruh kim pat pynpaw dak eiei shano ka ticket kan leit. Ka daw imat ba wat ha ka State Unit ruh ka BJP ka don hapdeng ka jingïapait, ha kaba kumba ka paw ha kine ki sngi kan don ka jingïasngewthuh jingmut hapdeng ki nongïalam, wat hapdeng ki arngut ki MLA ruh, kata u Bah AL Hek bad u Bah Sanbor Shullai. Nangta ruh ka don jingthnum ïa u President ka Party, u Bah Ernest Mawrie, kumba ka la pynpaw da u Bah JA Lyngdoh, MLA barim, uba la ïakhun ïa ka elekshon na ka BJP ha u 2018 na North Shillong bad u la shah rem salit ha u Bah Adelbert Nongrum.
U Bah Adelbert Nongrum u ïoh 5572 Vote katba u Bah JA Lyngdoh lpat u ïoh 5166 Vote.
