Nongpoh, Iaiong 16: Ki paidbah jong ka dong Ri Bhoi kila hap ban shongdum mynta la kumba 3 miet khlem ka bording elektrik kaba la buh iaki paidbah hapdeng ka jingeh kaba khraw ban pyndep iaki kam ki jam bad khamtam ki samla pule kiba pynkhreh iaki eksamin bapher bapher. Kane ka jingshongdum ka Ri Bhoi ka dei ruh hadien ba ka eriong ryngkat u phria kala khyrwit Ia bun tylli ki shnong haka them Ri Bhoi haka sngi Palei kaba la jynrat lut iaki dieng ki siej bad ki post elektrik watla ki bor jong ka tnad MeECL kidang pyrshang ban pynbiang iaka bording bad shna haki jaka ba shah ktah.
Bun naki paidbah kila ud la nam halor ka jingbym don bording ha Ri Bhoi ba kim ioh ban pyndep iaki kam ki jam, Kim ioh ruh wat ban pyndonkam mobile bad khamtam ki samla pule kiba dang pynkhreh iaki eksamin bapher bapher bad kyrpad ruh iaka tnad MeECL ban pynkloi katba lah naka bynta ban pynbiang iaka bording.
