3 kynhun ki SRT bad ki drone ban wad ïa ki shi kurim kiba jahrngai ha Mawlakhiat, Sohra

Shillong, Jymmang 28: Kumba lai kynhun ki nongleit wad ne Search and Rescue Teams (SRT) ba la kyrshan da ka K9 units, ki drone na NESAC bad ka jingdonlang ki pulit ka special operations team (SOT) la phah sha Sohra ha ka sngi Balang ban leit wad bad ban pyllait im ïa ki shijur ki nongwan jngohkai kiba la jah rngai kiba dei na Indore, jylla Madhya Pradesh.
Ïa kane la pyntip da u Myntri ka tnat Animal Husbandry & Veterinary u Bah AL Hek hadien ba u la leit jngoh ïa ka Sohra ban peit ïa ki jingïaid ki kam jong kane ka jingleit wad ïa kitei ki arngut.
“U Additional Deputy Commissioner (ADC) ka Sohra Civil Sub-division la batai ïa nga ba haduh ka 28 tarik, lai kynhun la phah ba kin leit ban wad bad pyllait ïa kitei ki arngut da ka jingkyrshan ka K9 units, ki drones na NESAC, bad ki pulit Special Operations Team (SOT), la dep ban buh sha Nongriat-Pyndemdkhar-Mawlakhiat
Mawsahew-Wahkaliar Weisawdong,” ïathuh u Bah Hek sha ki lad pathai khubor.
Hadien ba la bishar ïa kane ka kam jingleit wad ïa kitei ki arngut, u Myntri u la banjur halor ka jingdonkam ban pynsted ïa kane ka kam ban wad ïa kitei ki shijur kiba la jah rngai.
Katkum ka jingïathuh u ADC, kane ka jingwad ka kynthup ruh sha ki riat shi lynter ka Mawkdok, Umdiengpoh, bad shaduh Sohra Rim shi lynter ka Shillong-Sohra Road. Na ka liang ki nongshong shnong bad ki nongïalam shnong ki la ïalap ruh na ka bynta ki jingdonkam ban ïoh ki sakhi bad la bhah ruh ïa ki Block Development Officer ban kyntu ïa baroh ki field staff ban leh ïa kane kajuh ka kam.
Ha ka 22 tarik mynta u bnai, kine ki shijur u Raja Raghuvanshi bad Sonam ka tnga jong u ki la poi ha ka shnong Mawlakhiat (Elaka Mynteng) da ka scooty ba la shuwai ban leit jngoh ïa ka Double Decker Root Bridge ha Nongriat. Ki la ïadon bynta lang bad u nongïalam lynti u Bha Wansai, bad ki la sah baroh shi mied ha Shipara Homestay ha Nongriat, ïathuh u ophisar.
La ïathuh ba ha ka por 6 baje mynstep ha ka 23 tarik ki la mihnoh da ka jingthmu ban leit phai biang sha Mawlakhiat, hynrei ym shym la ïohi shuh ïa ki naduh katei ka por.
Ha ka 24 tarik la lap ïa ka scooty ba ki shimwai na Sohra Rim, kaba la don lang bad u shabi. Ki Pulit kila ïoh pdiang ïa ka jingujor na ki bahaïing jong kine ki shikurim kiba la pyntip ba ka phone jong kine ki shijur ka la lip naduh ka miet sngi U Blei.
Ha ka jingtohkit, ki Pulit kila lap ba kitei ki shijur kila ieh ïa ki tiar bad ki pla jong ki ha Manha Homestay kaba don ha Saitsohpen, Sohra, bad hadien la plied noh ïa kine ki pla hakhmat ki bahaïing hynrei ym shym la lap ksai satia shano ba ki don.
Ki la don lai tylli ki kynhun ba ïawad (search and rescue teams) ïa kine ki shijur da ka jingïarap lang ki K9 units, ki drone na ka North Eastern Space Applications Centre (NESAC), bad ruh ki pulit Special Operations Team (SOT), kiba la leit ban wad ha kylleng ki jaka.
Kine ki jaka ki kynthup ïa ka Nongriat, Pyndemdkhar, Mawlakhiat, Mawsahew, Wahkaliar bad ha Weisawdong. Ka jingwad ka ïai bteng wat shaduh ki riar ba jylliew jong ka Mawkdok, Umdiengpoh bad Sohra Rim bad ha ryngkat ka shilynter jong ka surok na Shillong sha Sohra.
U Bah Hek u la ïoh ruh ban peit bniah ïa ka jingtrei kam jong ki tnad bapher bapher bad u la pynpaw ruh ba donkam ban pynsted ïa ka jingïatrei lang bad pynlong ïa ka jingïawad bad u la kular ruh ba ka sorkar kan kyrshan pura bad kyntu ïa baroh ban ïa snohkti ban dang pynjur shuh shuh ïa ka jingwad ban lap ïa kine ki shijur kiba la jah noh.