Nongstoiñ, Naitung 27: Ka shnong Mynñiar ka dei ka shnong kaba don ha jrong lum kaba jngai kumba lai kilomitar na ka sshnong Siangra kaba don harud ka surok Rwiang-Langja bad ka dei ruh ka shnong kaba shitom bha ban ïoh surok wat la katta ruh ha ki snem ba la dep, ka sorkar lyngba ka skhim Mahatma Narional Rural Employment Guarantee Scheme (MNREGS), kaba la pynïaid da ka Mawhynrut C&RD Block ka la pyrshang katba lah ban pynpoi surok na Siangra shaduh katei ka shnong.
Watla katei ka surok kaba la shna lyngba katei ka skhim ka la don, hynrei namar ka dei ka surok khyndew kam lah ban shan khamtam ha ka por lyiur, namar ka jingsyllad jong ka um. Kumta katba nang slem ka la nang sniew kat haduh ba kam long shuh ban ïaid bad wat ki Mahindra pickup ruh ki la shitom haduh katata katta.
Ka jingsniew jong katei ka surok ka la buh ïa ki paitbah ha ka jingeh kaba khraw, hynrei uwei na ki samla rangbah na ka shnong Kriangrin u bah Aloysius Khardewsaw u ba shong ba sah ha ka shnong Kriangrin kaba jngai tang kumba san kilomitar na Siangra, u la ïoh jingtip halor katei ka jingeh jong ki bad u la leit ban peit bad lap ba katei ka surok ka la sniew shaba palat.
U bah Khardewsaw haba ïakren bad u nongthoh khubor haïing jong u hadien ba la wan phai na katei ka jingmaramot ïa katei ka surok, u la ong ba ka jingud jingnam jong ki nongshong shnong bad kiba haïing ha sem jong u kiba shong ha ka shnong Mynñiar, ka la pynlong ïa u ba un ym lah ban shu sngap.
Kumta da ka jingsngew lem bad ka jingsngewkhia mynsiem, u la pyrshang katba kot la la ka bor ban noh synñiang, ha ka ban pah maramot ïa katei ka surok da ki puh shilum, khnang ba ki kali mahindra pickup kiba kit ïa ki mar bam sha katei ka shnong ki lah ban ïaid.
U la ong ruh ba kaba kham pynpangnud ïa u kat haduh ba u hap ban sei lut katba u don ban pynlut ha kaba pah maramot ïa katei ka surok, ka long ba u lap ba ki longkmie kiba armet bad kiba shitom ki hap ban ïaid da ka kjat bad hiar ïa u thiep uba jngai bha, haba ki leit phah sumar haba ki shitom. Dei halor katei ka nongrim ba um banse ban shim ka jingkitkhlieh wat haba ka jinglut jingsep ha kaba phah maramot ïa katei ka surok ka long kaba bun.
U la ong ba haba u kynmaw ïa ki kyntien ba ki riewblei ki ju kren ha ki jingïaseng ki ong ba ka jingshakri ïa u para briew ka dei ka jingshakri ïa u Blei. Ka jinglehbha ïa kiba shem jynjar ka dei ka jinglehbha ïa u Blei bad dei kitei ki kyntien kiba ktah eh ïa u ba u hap ban ïarap katba u lah ei.
