3 klur ka skhim ban ai jingmyntoi ïa ki longkmie, ong ka Nirmala
![](https://mawphor.com/wp-content/uploads/2022/05/mawphor-1-1.jpg)
Shillong, Naitung 23: Ka Mang Tyngka 2024-25 jong ka Sorkar pdeng ba la wanrah ha Parliament mynta ka sngi da ka Nirmala Sitharaman, Myntri Sorkar Pdeng ba dei khmih ïa ka Tnat kam pla tyngka ka pyni ïa ka jingkut jingmut jong ka sorkar ban kyntiew ïa ka bynta jong ki longkmie ha ka jingkyntiew ïa ka ïoh ka kot.
Ka Myntri Kam Pla tyngka ka la pynbna ka jingmang pisa kaba palat T. 3 lak klur na ka bynta ki skhim ban ai jingmyntoi ïa ki longkmie bad ki khynnah Kynthei. La thmu ïa kane kum ka lad ban kyntiew ïa ka roi ka par ba ïalam da ki longkmie, ka la ong.
Ha kane ka jingkren na ka liang jong ka myntri ka la kynmaw ïa ka jingphaikhmat sha ka ‘Mahilayen’ (longkmie) ha ka Mang tyngka ba shipor, kaba long shi bynta jong ki saw tylli ki caste ba kham heh, kum ‘Garib’ (kiba duk ba suk), ‘Mahilayen’ (longkmie), ‘Yuva’ (ki samla) bad ‘Annadata’ (ki nongrep).
Kumjuh ruh ha ka Mang Tyngka 2024-25 jong ka sorkar pdeng bad ka la ong, “Ngi ïeng skhem ban pynthikna ba baroh ki briew jong ka ri, khlem da kheiñ ïa ka niam, ka caste, kynthei ne shynrang bad rta, ngi ïaid shaphrang ban pynurlong ïa ki thong jong ki ha ka jingim bad ki jingangnud.”
Ka Myntri Sorkar Pdeng ka la pyntip ba ka Sorkar kan pynsuk ïa ka jingïashim bynta kham bun ki longkmie ha ki jaka trei lyngba ka jingplie ïa ki hostel na ka bynta ki longkmie ha ka jingïatreilang bad ki karkhana, bad plie ruh ïa ki jaka ri khunlung.
Shuh shuh, ka jingïatreilang kan pynlong ïa ki prokram ai jinghikai ïa ki longkmie, bad kyntiew ka jingdon ki ïew na ka bynta ki SHG jong ki longkmie, la pynbna ka Sitharaman.