3 akar ka jaka bad ka ïing paki dulan ai ka Sorkar sha ki Harijan hajan TB Hospital

Shillong, Naitung 13: Ka sorkar jylla ka la tyrwa ban ai ka jaka kaba heh 3 akar sha ki Harijan kiba shong ba sah mynta ha Them Ïewmawlong bad kane ka jaka kadei kaba don marjan bad ka RP Chest Hospital ne ka TB Hospital kumba ïa tip paidbah, kaba don ha Upper Mawprem.
Kane ka long katkum ka jingpynip ka sorkar lyngba ki nongsaid aiñ jong ka ha ïingbishar jong ka jylla.
Ha kane ka jaka kaba heh 3 akar, ka sorkar lyngba ka blue print kaba la pynkhreh da ki bor treikam jong ka sorkar la pynpaw ruh ba yn tei ïa ka ïing paki dulan ne kata ka Multi Storied Building ban pynshong pynsah ïa kine ki kynhun kiba dei ki nongtrei jong ka Municipal bad ka tnad Urban Affairs bad kiwei kiwei de ki tnad treikam jong ka sorkar.
Lah ban kdew hangne ba kane ka jingtyrwa ka sorkar ne ka jingpyntip ka sorkar ka long hadien ba ka High Level Committee (HLC) kaba la thung da ka sorkar, hadien ka jingïakhih kaba jur ban dawa pynkynkynriah noh ïa ki Harijan na kane ka jaka, ïa kaba don kiba la ssdang ban khot ka Them Metor, ka la ai jingmut sha ka sorkar ban pynkynriah noh ïa ki na katei ka jaka, ïa kaba la shimti noh da ka tnad Urban Affairs hadien bala siew 1 klur tyngka sha ka Hima Mylliem, kaba dei ka trai jong kane ka jaka.
Hadien ba la tyrwa ban pynkynriah noh bad ba ka Harijan Panchayat Committee (HPC) ka la mynjur ban mih noh tang halor ka nongrim ba lada ka sorkar ka pynïoh h aki ïa ka jaka kaba long hapdeng Sor. Na ka liang ka sorkar ka la aiti ha ka Tnad Urban Affairs ban pynkhreh ïa ka Blue Print ne ka dur ka dar jong kane ka jaka sah ba thymmai ki Harijan.
Kum ban pynkynmaw ba dei ha u bnai Jymmang jong ka snem 2018, kumba ar bnai tam hadien ka jingshimti ka sorkar MDA ïa ka jingsynshar ha ka jylla, la bthei puk ka jingïakhih pyrshah ‘khar metor’ hadien ba uwei u khynnah bud Bus saw u la shah shoh ha ki briew kiba shong ba sah ha katei ka jaka. Kane ka jingshah shoh une u Samla ka la pur sted bad ki paidah na kylleng ki la mih sha Motphran bad kiwei kiwei de ki jaka ban pynlong ka jingïakhih kaba la neh bad sngi bad miet haduh bun bun sngi.
Namar ka jingjur ka jingïakhih, ka sorkar kala pynjari da ka korphiw ha kine ki bynta kiba jur ka jingïakhih kum ha ki thaiñ Motphran, Mawkhar, Jaïaw, Wahingdoh, Umsohsun, Riatsamthiah, Mission Compound, Wahthapbru bad kiwei kiwei de ki jaka. La khang ruh ïa ka Internet bun bun sngi bad ka korphiw ruh ka la neh bun bun bnai.
Nangta la khang syndon sbak ïa ka surok kaba ïaid lyngba kane ka Them Metor haduh mynta.