Shillong, Nohprah 10: U MLA ka South Shillong Constituency u Bah Sanbor Shullai uba long ruh u Chairman ka Monitoring Cum Implementation Committee ka 19th South Shillong Constituency, ha ka Sngi Saitjaiñ ula pynlong ïa ka Pre Christmas bad New Year Get-Together ha kaba ula ai jingïarap T. 3,50,000 sha ki 14 tylli ki Balang Khristan na ka bynta ban ïoh pynkhreh ïa ka jingrakhe ïa ka Khristmas.
U Bah Sanbor ula ai ïa katei ka song tyngka sha ki 14 tylli ki Church Committee kiba kynthup ïa ki Balang Khristan ki Khasi, Jaintia, Garo bad ki bym dei riewlum kiba hap hapoh jong ka South Shillong Constituency, lyngba ka Discretionary Grant jong u snem 2023, khnang ba kin ïoh ban pynkhreh ïa ka Khristmas & Snem Thymmai ha ki Balang ki jongki bad la ki riewngeit.
Kum u MLA u Bah Sanbor ula kyntu ïa ki nongïalam Balang ba kin ïaleh ban pyndon bynta lang ïa ki heprit khamtam eh ïa kito kiba wan na ki longïing baduk ba kin rakhe ïa ka Khristmas nad Snem Thymmai.
U Bah Sanbor ula pynbna ba yn pynlong ïa kane ka jingrakhe ryngkat bad ka jingsam ïa ka jingïarap man la u snem bad baroh ki Balang Khristan kiba don hapoh ka Constituency.
Hadien ba la dep ban sam ïa katei ka jingiarap la pynlong ïa ka jingot ïa u cake christmas bad ka jingdih sha bad la pynkut ïa katei ka prokram da ka jingbuh jingduwai u Pastor Rev Sadhu Sundar Singh jongka North India Christian Church.
