Shillong, Nailur 09 : Ka Sohryngkham ka la ïoh ban pynliem noh ïa ka PFR Academy da 2-1 kol ha ka jingïakhun na ka Group C jong ka Shillong Sports Association’s Second Division 2025 kaba long ha kane ka sngi Ba-ar ha madan SSA Stadium, First Ground, Polo.
Hadien ba ka jingïakhun ha ka kylla step ka la kut noh khlem da don mano mano ruh ba ïoh ban thep kol dei u Edelbert Khongshun uba la ïoh ban lamkhmat na ka bynta ka PFR ha ka minit kaba 68 jong ka kylla miet. Tangba tang hapoh khyndiat minit ka Sohryngkham ka la ïoh ban pynphai kylla noh ban pynïakhaid ïa ka jingïakhun lyngba ka kol na u Daiomiki Kharpran ha ka minit kaba 74.
Bad dei tang hapoh ki 12 minit ei ei ba ka Sohryngkham ka la ïoh biang sa shi kol na u Pynshongdor Pyngrope lyngba ka kol ha ka minit kaba 86 kaba la pynlong ïa ka Sohryngkham ba kan pynskhem syndon ïalade ban ïoh ïa ka jingjop ha kane ka sngi.
Ka jingïakhun ha kane ka sngi kadei ruh ka jingïakhun ba khatduh na ka Group na ka bynta jong ki baroh ar liang bad da katei ka jingjop ka Sohryngkham ka la ïoh ban kiew sha ka kyrdan kaba nyngkong da ki 8 point. Katba ka PFR pat ka la don ha ka kyrdan kaba saw da ki ar tylli ki jingjop bad lai tylli ki jingshah rem.
Mynta ka sngi pat ka jingïakhun kan long hapdeng ka Mawpat pyrshah ïa ka Mylliem Lum na ka Group A ha ka por 1:30 baje mynsngi.
