29 tarik yn pyni ka sorkar ïa ka Blueprint ha ki Harijan halor ka ïing sah bun mala jong ki

Shillong, Nailur 27 : Ka sorkar an sa pyni noh ïa ka Blueprint ha ki Harijan Panchayat Committee (HPC) ha ka 29 tarik Nailur 2022 ha kaba ïadei bad ki ïing paki dulan ba bun mala ba ka sorkar ka pynkhreh ban tei bad pynsah ïa ki khnang ban pynkynriah noh ïaki na Them ïew Mawlong.
Kine ki long ïing ki ban leit sah ha kitei ki ïing bun mala ban tei ka sorkar hajan ka ïing sah u Nongialam ka Liang Pyrshah ki don haduh 342 tylli ki long ïing.
Haba ïathuh ïa kane mynta ka sngi, ka khubor ka ïathuh ba ha kane ka jingïalang yn khot ïa ki nongmihkhmat na ka HPC, bad na ka liang ka sorkar yn don na ka tnad Urban Affairs , Municipal, Chief Secretary bad yn pynïaid ïaka jingïalang da u Symbud Myntri Rangbah bah Prestone Tynsong ha katei ka 29 tarik.
“ ïa kane ka blueprint la dep pynkhreh nadong shadong bad yn sa pyni ha ki nongïalam ka HPC ha katei ka jingïalang. Kane ka blueprint kan pyni kumno la pynkhreh ïa ka plan ban tei ïa kitei ki ïing paki dulan ba bun mala ban pynsah ïaki 342 tylli ki long ïing ki ban pynkynriah na Them ïew Mawlong” ong ka tyllong khubor.
La ïathuh ba ïa ka Detail Project Report (DPR) la nang pynkhreh mynta. Ka tnad Urban Affairs ka la pan jaka shuh shuh na ka tnad Revenue nalor kaba la don lypa ha ka Quarter ba la dep pynkhreh ban pynkynriah ïa ki ba la dep thaw da ka Shillong Municipal Board (SMB).
Ha ka 31 tarik Nailar mynta u snem ka sorkar MDA ka la shim ïa ka rai ban pynkynriah noh ïa ki 342 tylli ki long ïing na Them ïew Mawlong sha ki quarter ba la dep tei da ka SMB bad ban pan jaka shuh shuh mar jan bad katei ka jaka ban ïoh pynsah lang ïa ki hajuh.
Ka la rai ruh ban tei ïa ki ïing sah jongki ha katei ka jaka kaba heh 2.5 acre. Ka sorkar ka la rai ban pynpra noh ïa kito kiba rim bad ban tei noh da kiba thymmai. U Symbud Myntri Rangbah u bah Prestone Tynsong uba dei u Chairman jongka High Level Committee u la dep ïa thuh ba ka sorkar ka don ka jingthmu ban tei 12 tylli ki ïing paki dulan ba bun mala khnang ba kine ki 342 tylli ki long ïing kin ngiam ban sah. U la ïathuh ba ka sorkar kan ym pdiang palat ïa kitei ki 342 tylli ki long ïing bad ïa kine ki list la dep aiti ruh sha ka ïing bishar High Court jongka jylla.