Shillong, Nailur 22: Ka Shillong Sports Association ka la pynbna ba kan sa sdang noh ïa ka First Division Football League 2025 ha ka 29 tarik Nailur, ha kaba kin don 10 tylli ki kynhun ki ban ïaknieh ïa ka khusnam bad ruh ban kiew kyrdan sha ka lympung Shillong Premier League.
Kine ki kynhun ki kynthup ïa ka Nongthymmai SC, Ryntih SC, Mawkhar SC, Pohkseh SC, Nongkrem SC, Nongkseh SC, Meghalaya Police, Lawsohtun SC, Mawtawar SC bad ka Nongrah SC.
Yn plie pyrda ïa ka jingïalehkai kaba nyngkong hapdeng ka Meghalaya Police bad ka Nongkrem kiba la kiew kyrdan na ka Second Division, ha kaba ka MLP ka la rah ïa ka nam lahduh bad ka Nongkrem ka la wan ba ar (runners-up).
Mynta u snem ïa kane ka lympung yn pynïalehkai da ka League stage, ha kaba baroh 10 tylli ki kynhun kin ïa aireng pyrshah kawei ïa kawei pat mar shi sien. Kano kano ka kynhun kaba pyndep ha khlieh duh jong ka miej kan ïohrah ïa ka nam lahduh.
Baroh ki jingïakhun yn pynlong ha madan ïalehkai First Ground-SSA Stadium, ha Polo.
