Shillong, Jylliew 6: Ka ophis u District Sports Officer ka East Khasi Hills ka pyntip ba kan sa pynlong ïa Subroto Cup kaba la tip kum ka District Level Inter School Subroto Cup Football Tournament 2022 kaban sdang naduh ka 28 tarik Jylliew 2022.
Katkum ka kyrwoh khubor na u DSO ka EKH u Bah O. Mawthoh la ïathuh ba ha kane ka lympung yn pynlong na bynta ki Under-14, Under-17 (Boys) bad Under-17 (Girls).
La bthah ruh ba ki skul kin hap ban pynpoi ïa ka jingpyndap kyrteng ha ryngkat ki syrnot sngikha da kaba xerox ha ryngkat ka dur. Na bynta ki Under-14 (boys) kaba dei ka Sub-Junior yn shah na bynta ki khynnah kiba kha hashwa ka 1 tarik Kyllalyngkot 2009, Junior Under-17 kiba kha hashwa ka 1 tarik Kyllalyngkot 2006 bad Junior Under-17 (Girls) kin dei kiba kha hashwa ka 1 tarik Kyllalyngkot 2006.
Ka tarik ba khatduh ban pynpoi ïa ka bai rung kan long hashwa ka 20 tarik Jylliew 2022 ha ophis u DSO EKH bad ka tarik ban bishar bniah ïa ki kyrteng kan long ha ka 23 tarik Jylliew 2022. Ki khynnah kin hap ruh ban rah lang ka syrnot sngikha ha katei ka sngi bishar bniah.
