Shillong, Nailar 04 : Ka Mawkynrew Cup Committee (MCC) kan sa sdang noh ïa ka lympung ïalehkai football ba heh duh ha ka thaiñ Mawkynrew Block kaba la tip kum ka 3rd Mawkynrew Cup 2022-23 ha ka 27 tarik Nailar 2022 ha Mawleiñ Football Ground. Ïa ka jingïalehkai la phiah ha ki saw tylli ki zone kata ha Jatah Area, Mawleiñ Area, Thansning Area bad ha Jongksha Area.
Ban pynïaid shaphrang ïa katei ka tournament kaba heh duh ha katei ka thaiñ, ka Mawkynrew Cup Committee ha ka 3 tarik Nailar ka la pynlong ïa ka jingïalang ha ryngkat ki club jong ka thaiñ Mawkynrew Constituency ïa kaba la pynlong ha Dorbar Hall jong ka shnong Jongksha.
Ïa ka jingïalang la plie da u Bah Shrenly Khriam uba dei ruh u Joint Secretary jong ka Mawkynrew Cup Committee, ha ka jingïadonlang ki dkhot bad nongkitkam ba kynthup ïa u Bah Ïakmenlang Wankhar uba dei u Secretary, Bah Arlast Pyngrope, Bah Hasan Kharbyngar, Bah Tympang Pohshna uba dei u Chief Coordinator ka Mawkynrew Cup, nangta ki President bad Secretary jong ki 70 tylli ki club jong katei ka thaiñ.
Ha katei ka sngi la ïoh ruh ban pyllait ïa ka form pynrung kyrteng sha baroh ki club kiba la poi ha katei ka jingïalang.
La ïoh ruh ban ïakren ha katei ka sngi hapdeng ki dkhot jong ka Mawkynrew Cup bad ki President jong ki 70 tylli ki club ha kaba ïadei bad ka 3rd Maw-kynrew Cup.
Na ka liang u Bah S. Kriam uba dei ruh u kongsan ha katei ka sngi u la maitphang shibun kiba ïadei bad katei ka lympung kaban sa sdang noh shen bad u la pyntip ruh ba kan don ruh ka jingïalehkai football jong ki kynthei ha katei ka Tournament.
Ïa ka jingïalang la ïoh ban ai khublei da u Bah A. Pyngrope uba dei ruh u Sordar ka Shnong Mawlyngot ha kajuh ka por u dkhot jong ka Mawkynrew Cup Committee naduh u snem 2017.
