26 tarik yn sdang noh ka Subroto Cup Football ha West Khasi Hills

Nongstoiñ, Jylliew 22: Ka District Sports Officer jong ka West Khasi Hills District, I Kong Balarina Syiem I la pynshai halor ki jingkynnoh kiba bun halor ka jingleh screening ïa ki khynnah ïalehkai na ka bynta ka District Level Inter School Subroto Cup Football mynta u snem.
Lah ban kdew hangne ba ha kine ki khyndiat sngi ba la dep ka jingleh screening ka la por haduh ka por mynmiet, ha kaba ka la wanrah jingbitar ïa kiba bun. Hynrei, na ka liang ka DSO I la pynshai halor kiba bun ki mat kiba ïa dei kiba la mih ha ki lad pathai khubor ïa kaba la kynnoh da ki nonghikai bad kumjuh ruh ki sengbhalang.
Haba kren bad ki nongthoh khubor mynta ka sngi ha ophis treikam jong I, I la pynpaw ka jingpynrem ruh ïa ki katto katne ki nonghikai kiba im kwah ban pynpaw kyrteng, ha kaba ha ka por screening ïa ki khynnah, ka la don ka jingbyrngem ïa ki nongleh screening da kaba ong kyntien, ‘ngan thap ïa pha, pha ba kumta kumta’.
“Nga pynrem jur ïa kane bad lada kum ki nonghikai hi kiba ngi baroh ngi da burom kyrpang, hynrei lada ki mih kum kine kiei kiei, ngam lah ban khlem da pynrem. Lada ki dei shisha kita ki nonghikai kiba don jingkitkhlieh bad kumta ki riew rangbah, ki dei ban wan shakhmat ban ïakren da kaba shai keiñ. Ym dei ban shu byrngem ne hylla hakhmat kiba bun”.
“Ki don ruh ki briew kiba kam ïalade ba ki dei kiba ieit ïa ka Sports, kiba kwah ban kyntiew ïa ka sports. Hynrei, ki dei kita hi kiba leh thok lane kiba sdang halor kine kiei kiei baroh. Haba ngi kwah ban kyntiew ngi donkam ïa ka jingïatreilang, kata naduh ki nonghikai, ki nongshong shnong, ki sengbhalang barooh namar tang kane ka ophis marwei ngim lah ban kyntiew ïa ka sports hapoh ka District”.
“Naduh kaba sdang hi ngi kwah ban rat diengkhong ïa ki jingleh thok leh shukor baroh ha ka Sports, kumba ngi lap ha kine ki certificate jong ki khynnah ba ki wan ïalam mynta na ka bynta ka screening. Ngi da lap pylleiñ pylleiñ ïa ki jingleh thok ha kaba ngam kwah ban jer kyrteng ïa kita ki skul bad kita ki skul ruh ki tip hi ïa kata ruh”.
“Ki don ruh ki skul kiba phah ïa ki khynnah na kiwei ki skul ban ïalehkai na ka skul jong ki. Hynrei ngim kwah ban leh ei ei ïa mynta, hynrei ngin ïaid suki suki. Bad na ka liang jong ka ophis kan sa leh ïa kaba donkam ban weng ïa ki kam thok”.
“Ngi don ka jingkyrpad ïa ki nonghikai, ba kaba nyngkong eh ka kam ban rat dieng khong ïa kine kiei kiei baroh ka dei nyngkong na skul hi. Namar lada ki nonghikai ki lah screen bha ïa ki khynnah naduh na skul, kin ym don shuh kine kiei kiei baroh khoit. Nga sngew ban kyntu bad kyrpad ïa ki nonghikai ba nangne shakhmat, kata shwa ba kin phah ïa ki khynnah sha kiba kum kine ki screening ne tournament, kin sngewbha ban da screen bha shwa na skul”.
“Na ka liang ka ophis lei lei ngi don ka jingshaniah ba tylli ha ki skul, ba kin phah beit da ki biang ki certificate. Hynrei lada ngi lap pat ïa kiba kum kine ki skul ba leh kumta, ka long kaei kaei kaba sngewsih. Nangne shakhmat ngi kwah ban pynbeit ïa baroh kine ki jingleh thok”.
Ha kaba ïa dei bad ka jingscreening haduh ka por ba la miet, ïa la ong, “Ha kaba ïa dei bad ka jingmiet te na ka liang jong ngi, ngi kubur ïa ka jingbakla. Nga da kular ruh ba ha ki snem ban wan, ngin pynbeit nadong shadong ba kan ym don shuh ka jingpynslem”.
“Ki don ruh ki daw kumba long mynta u snem ba ka jingpoi screening haduh ka por mynmiet, ka dei namar ki don ki skul kiba lada ngi pynleh biang ha kawei ka sngi ruh, ka don jingeh ha ka bai leit bai wan jong ki skul. Ha ki snem ba la leit, kiba wan sha ka screening, ngi ju shim beit thik 16 ngut ha kawei ka team. Katba mynta ka ophis ka la leh thymmai da kaba ailad haduh 25 ngut”. “Ha kaba ïadei bad ka jingkynthoh ba ki don ki Coach kiba Coach ïa kiwei ki skul kiba don ha ka screening committee, hynrei ka ophis ka kyntait mardor ïa kata. Namar ha ka screening committee ngim lah hi ruh ban shim ïa kino kino ki coach, ki nonghikai lane kino kino kiba don bynta bad ki skul”, ong I Kong Balarina Syiem DSO West Khasi Hills.