Shillong, Nailur, 01: Ki Pulit jong ka Anti-Narcotic Task Force, ka East Khasi Hills Distirct kiba la ïoh jingtip kaba bniah na ki tnat syntiat ha ka janmiet sngi Balang ki la pynlong ka jingkhynra ha ka dong Lumjingsuk Block-A, kaba hap hapoh ka shnong Madanryting, Shillong.
Ha kane ka jingkhynra kaba la pynlong ha ka por 8:00 baje mynmiet, ki Pulit ki la ïohkem ïa lai ngut ki snar khaii drok kiba kynthup uwei uba kyrteng u Ronald Laloo, 24 snem ka rta bad arngut kiwei pat kiba la tip kyrteng kum u Banphiralang Shabong uba la 41 snem bad u Thangboi Paite uba la 46 snem.
Katkum u kyrwoh ba la phah da u Superintendent of Police (city) u Bah Vivek Syiem, la ïathuh ba ha kane ka jingkhynra, ki Pulit ki la ïoh kurup 26.61 gram u drok Heroin, 31,380 hajar ka pisa, 4 tylli ki Mobile Phone, lai tylli ki synduk thep sabon, san tylli ki tin golden thep duma, 4 tylli ki tyndong thep snam bad uwei u thyrnia injek, kawei ka scooty TVS, kawei ka kali i-10 rong saw.
Ha kaba ïadei bad kane, ki Pulit ki la register case ha Madanryting Police Station bad la pynngat ïa kine ki snar khaii drok hapoh ki kyndon 21 (b)/25/27/29 jong ka Indian Penal Code.
