Mairang, Nohprah 05: Ka ju don ka jingong ba haba don ka mon, ym don kano kano ka jingkhanglad ban jop ïa ki jingeh.
Kane ka don ha ka mynsiem ïakhun jong ki Khynnah kiba don jingduna ki dkhot met.
Katkum ka jingïathuh u Joint Director jong ka MBoSE, u Bah M. Marbañiang la ong ba naduh u snem 2013 haduh u 2022, ki la don haduh 254 ngut ki khynnah ba don jingduna ki dkhot met kiba la ïaleh ïa ka eksam SSLC ne ka eksam Matrik bad na kine kiba la pass ki long 174 ngut.
U Bah Marbañiang u la ïathuh ïa kane haba kren ha ka jingïalang ban rakhe ïa ka International Day for Persons with Disability kaba la long ha ka 3 tarik mynta u bnai ha Mairang Vidyajyoti Inclusive Secondary School, Sangshong Mairang. Ïa kane ka jingrakhe la pynlong da ka Skul MVISS ryngkat ka jingïatreilang bad ka Block Mission Coordinator SSA, Mairang.
Haba kren kum u Kongsan, u Bah Barbañiang u la ïathuh ruh ba bun na kine ki khynnah ym tang ba ki la pyndep ïa ka matrik, hynrei ki la leit bteng ruh ïa ki jingpule sha ki kyrdan kiba kham shaneng.
“Kane ka pyni ba ki Khynnah wat lada ki don jingduna dkhot met, hynrei ki lah ban bun ki kam kiba ngi, ngim mut dur ba ki lah”, u la ong.
U la ïathuh ruh ba na ka liang ka sorkar ka la shimkhia na ka bynta jong ki briew kiba kum kine, ha kaba ha ka snem 2003, ka la thaw ïa ka Commissioner for Persons with Disability. Lyngba kane, la pynmih bun ki skim na ka bynta ki briew ba don jingduna ha kaba la pyntreikam ruh da ka tnad pule puthi. Mynta ki khynnah ki lah ban ïaleh eksam ha kaba wat lada kim lah ban thoh ruh, la buh da ki briew ba pynthoh na ka bynta jong ki, da kaba ki shu batai ïa kaei kaba ki kwah ban thoh. Nangta ha ka liang ka Mathematics ruh ne ka jingkheiñ, la buh noh da kaba kham suk ka bym long kum kajuh kaba ïaleh eksam da ki khynnah kiba biang ka met ka phad.
Shuh shuh u ophisar ka MBoSE, u la ïathuh ba i don ruh ki Scholarship ba kyrpang na ka bynta ki khynnah skul ruh kumjuh.
U Bah Marbañiang u kyrmen ruh ba ka KJP Synod Sepngi kaba long ka nongseng jong ka skul, kan mang khambun ka pisa na ka Budget jong ka na ka bynta kane ka Skul khnang ba kan nang kiew shaphrang. U la ai jingïaroh ruh ïa ka Synod bad ïa ka Skul kaba pdiang lang ïa ki Khynnah kiba biang ka met ka phang bad ïa ki Khynnah kiba duna ki dkhot met bad u ngeit ruh ba kane kan long ka jinghikai kaba khraw na ka bynta ka longbriew manbriew.
U Bah A. Nongbri, ADC North Eastern West Khasi Hills District, uba long u Symbud Kongsan, ha ka jingkren jong u, u la pynpaw ka jingsngewnguh ïa kane ka skul kaba la ïarap ïa ki nongpynïaid elekshon ban ai jinghikai na ka bynta ka Sign Language, kaba la long ka jingïarap kaba khraw ïa ka tnad elekshon ha kaba pyn9aid ïa ka elekshon.
Ha kane ka jingrakhe ïa ka sngi ïa ka sngi ba kyrpang ki briew ba don jingduna ki dkhot met, ka skul ka la pynkup burom ruh ïa ki shiphew ngut ki khynnah kiba la pyndep ïa ka SSLC eksam ha u 2022. Ha kane ka sngi la pynphuh pynphieng ïa ka jingrakhe da ka jingrwai, jingshad bad ka drama lyngkot ki khynnah skul.
Ïa ka jingïalang la pynïaid da u Rev. IW Nongsiej, Chairman ka Managing Committee bad la ïadon lang ruh u Rev. RPL Nonglait, Director ka SELDD jong ka KJP Synod Sepngi, uba la ai jingbatai kaba khamshai ïa ka jingmut kane ka sngi, nangta u Rev. WC Khongwir, Chairman barim ka MC, ki Nonghikai, ki Kmie ki kpa bad ki Khynnah Skul. U T.Bn P. Sohkhlet, Member Managing Committee u la ai ïa ka jingduwai sdang bad u Bah K. Wahlang, Block Mission Coordinator SSA Mairang ruh u la ai jingkren.
I Principal jong ka skul, i Kong B. Lyngdoh Mawnai, i la ïathuh ha u snem 2023 kin don arngut ki khynnah ban ïaleh ïa ka eksam SSLC na kane ka skul.
