Nongpoh, Risaw, 31: Kumba 25 ngut ki samla na kylleng ki district jong ka jylla Meghalaya kila ïoh ka jingmyntoi kaba khraw hadien ba kila pyndep ïa ka prokram ai jinghikai ba 2 taiew lynter halor kumno ban shna ïa ki jait jingshna bapher bapher da kaba pyndonkam tang da u siej ba la tip kum ka “Executive Course On Bamboo Handicrafts & Utility Products Making” hapoh ka skhim “Raising And Accelerating MSME Performance (RAMP)” ba la pynlong da ka tnad Commerce & Industries jong ka sorkar Meghalaya ha ka jingïatreilang bad ka North East Cane and Bamboo Development Council.
Ïa kane ka prokarm ai jinghikai ba ar taiew lynter la pynlong ha NECBDC, Byrnihat Assam bad la sdang ïa ka naduh ka 21 tarik Risaw bad pynkut pat mynta ka 31 tarik Risaw hadien ba kitei ki 25 ngut kila pyndep ïa ka jinghikai ban shna ïa ki tiar bapher bapher naduh ki pela, ki kriah, bad kiwei kiwei da kaba pyndonkam da u siej.
Ha kane ka sngi ka jingleh burom ïa kitei ki samla bad pynkut noh ïa katei ka prokram hikai la sakhi ruh da ka jingdonlang u Bah DM Sun, Functional Manager DCIC Ri-Bhoi ha ka jingdon ryngkat u FA Sangma, Functional Manager, u Bah R Laloo, Industrial Promotion Officer, u HPK Singh, Manager (Training), NECBDC Byrnihat lem bad kiwei kiwei ki ophisar na NECBDC, bad na DCIC.
Ha kane ka sngi kitei ki samla kila ïohpdiang ruh ïa ki syrnod bad ki certificate ryngkat ki tiar shna jingshna shuwa ba kin leit phai biang sha ki shnong jong ki bad lyngba katei ka prokram ka jingangnud hi ka long ba kitei ki samla ki lah ban pyndonkam ïa ka sap jong ki ban shna jingshna bad ba kin ïoh pat ban sengkam sengjam sha ki jaka ba ki leit khnang ba kan long ka kamai bad kyntiew ïa ka ïoh ka kot jong ki.
