Nongpoh, Jylliew 15: Kum shibynta ban pynneh pynsah ïaki dohkha dohpnat bad ban hikai ruh sha ki paibah ban nym pyniap dusmon ïaki dohkha, ka Ri-Bhoi Youth Federation, Bhoilasa Circle haka jingïatreilang bad ka tnad Fisheries, mynta ka sngi kila leit ban theh kumba 25 hajar tylli ki symbai dohkha ha Wah Umiam kaba don haka shnong Mynsaiñ bad Pynthor.
Ha kane ka sngi ka jingpynlait ïa kitei ki symbai dohkha, la don ryngkat ruh da u Bah Kynsaihunlang Nengnang President ka Eastern Zone, Bah PS Suting Officer Incharge ka tnad Fisheries ha Ri-Bhoi, ki nongïalam ka RBYF ba kynthup ïa u samla Kit Kharlukhi, Spiritual Hinge, Ribbleshon Rynghang bad kiwei kiwei haka jingdonlang u Bah Shemphang Rympei Rangbah Shnong bad kiwei kiwei ki riew rangbah.
Naka liang ka seng haka jingtreilang bad ka tnad Fisheries Ri-Bhoi kila shim ruh ïa katei ka sienjam ban theh dohkha ha katei ka wah ban pynroi bad pynneh pynsah ïaki dohkha ba kim dei ban duhjait bad ban hikai ruh sha ki paidbah ba kidei ban pynneh pynsah ïaki dohkha, ym ban dusmon lane ban pyniap pathar da kaba ber dawai bad kiwei kiwei ki rukom.
Haba kren ha katei ka shnong naka liang ki nongïalam ka seng kila pynpaw ba katei ka wah ka dei kaba paw ha katei ka thaiñ kaba don ruh shibun ki jait dohkha ba ki nongkhwai ki ju sngewtynnad ban leit khwai, bad dei na katei ka daw ba kum ka seng ka kwah ba katei ka wah kan long kum kawei naki wah ba ki dohkha ki roi.
Naka liang ki nongïalam seng kila kyntu ruh sha ki paidbah ba ki dei ban don ka jingkitkhlieh ban pynneh pynsah ïaki dohkha bad baroh ki jait jingthaw ba im, ban sumar ruh ïaka mei mariang, ym ban pyniap pathar ïaki dohkha bad ki mrad ki mreng.
