Nongpoh, Nailar, 17: Ba dang bun ki Kali ar shaka kiba dang bteng ban pynkheiñ ïa ki kyndon ñiah kali bad bunsien ba ju wan rah ki jingjia ba sngewsih, ki Pulit ka tnad Traffic na Nongpoh Police Station mynta ka sngi u Blei ki la pynlong ïa ka jingbat ïa kiba bun ki Ki Kali ar shaka kata naduh ki Scooty bad ki Thuk thuk kiba ïaid lyngba kane ka surokbah National Highway-6 ha Ri Bhoi District.
Ïa kane ka jingkhynra ne bat ïa ki Kali ar shaka kiba pynkheiñ ain la pynlong ha ka surokbah National Highaway-6 hajan ka ophis u Deputy Commissioner ka Ri Bhoi bad da ka jingpynlong ban bat ïa kiba pynkheiñ aiñ bun kito ki Kali ar shaka ki la shah dain kuna.
Kum ban pynkynmaw, ki Pulit ka tnad Traffic na Nongpoh Police Station na ka por sha ka por ka ju pyrkhing bad tehlakam ïa ki kali kiba pynkheiñ aiñ bad lah ba ong ba bun ki Kali ar shaka ne saw shaka ki la shah daiñ kuna naphang ha ka por kaba ki ju pynlong ïa ka jingkhynra, hynrei kumba long haduh mynta dang bun kiba ïaleh pyrshah bad kiba ym burom ïa ki kyndon aiñ ñiah kali ba ju wan jia bunsien ki jingjia ba sngewsih ha kane ka surokbah National Highway-6 ha Ri Bhoi District.
Kumba la ïoh lum jingtip, kane ka jingkhynra ne bat ïa ki Kali ba pynkheiñ aiñ, ka dei ka jingtehlakam ban pynduna ïa ki jingjia ba sngewsih bad kum ki bor pulit ki ju bat ïa ki kali ba pynkheiñ aiñ kata naduh kiba dih buaid, kiba ym deng helmet bad kiba pynher sted bad wat la katta ruh dang bun kiba ïa leh pyrshah bad haba ki ïaleh pyrshah ki hap ban siew ïa ka kuna haba ïoh ban bat ne kem ïa ki.
Kumba long mynta ka sngi U Blei ha ka jingkhynra ne bat ïa ki Kali ar shaka, ka tnad Pulit Traffic na Nongpoh ka la ïoh ban dain kuna haduh T. 25 hajar tang mynta ka sngi bad kine kiba shah daiñ kuna ki dei kiba pynkheiñ ain kum ka jingpynher sted ïa ki kali, ka jingbuaid bad ruh ka jingbym deng ïa ki Helmet. Bun na kitei kiba pynkheiñ aiñ ki hap ban siew ïa ka kuna lyngba ka e-challan hadien ba ki la pynkheiñ ïa kita ki kyndon aiñ ba la buh da ka sorkar.
Ki pulit Traffic ka Nongpoh ki la pyntip ruh ba na ka liang ka tnad Traffic kin nym shongkli kti bad kin dang bteng ïa kane ka jingbat ne khynra ïa ki Kali ba pynkheiñ aiñ bad la leh ruh ïa kane ka kam ka long ban ïada ban lait na kino kino ki jingjia ba sngewsih la ka long ïa ki paidbah ne ïa kito kiba ñiah ba bunsien ka ju jia ka jingjia ba sngewsih ka dei tang na ka daw ka jingpynkheiñ ïa ki kyndon ñiah kali.
