Shillong, Jylliew 26 : Ki paid nongpang kin mad ïa ki jingeh namar ki Doktor hapoh ka lama Meghalaya Medical Services Association (MMSA) ki la rai ban sangeh treikam 24 kynta naduh kapor 9 baje mynstep jongka 28 tarik namar ka jingleh bym salia ka sorkar ban pynshitom ïa ki bor pynïaid ka Indian Institute of Public Health (IIPH) kiba la kren tohmet bad kynnoh khlem nongrim ïa u DHS (MI) u Dr Aman War ha ki lad pathai khubor.
Ha ka jingshisha na ka liang ka MMSA ka la ai por ïa ka sorkar haduh ka 24 tarik bad lada kam leh ei ei pyrshah ïa ki bor pyniaid ka IIPH kin sdang da ki jingïakhih kiba tyngeh hapoh ka jylla. Hynrei namar ba ka sorkar ka leh matlah bad kyllut beit kat haduh mynta ka sngi da kaba khlem leh ei ei ïa ki bor pynïaid ka IIPH kumta ki doktor ruh ki la rai ban ïaid beit shakhmat kumba la dep rai.
“Ka Exetive Committee jongka MMSA ka la shim ïa kane ka rai ban ïaid beit shakhmat da ki jingïakhih hadien ba ka la ïohi ba ka sorkar ka leh bym patiaw halor ki jingdawa jongka seng kumta kim banse ban sdang noh da ki jingiakhih kiba tyngeh nangne shakhmat” pynpaw u General Secretary ka MMSA u Dr R Pohsnem ha ka shithi ba la phah sha i Secretary ba dei peit ïa ka tnad ka koit ka khiah hadien ka jingiakynduh ka State Executive Committee (SEC) ha ka 24 tarik mynta u bnai.
Na ka liang ka MMSA ka la dep ai shithi ruh sha u Myntri ka tnad ka koit ka khiah u James P.K Sangma ha ka 1 tarik mynta u bnai ha kaba la dawa ban phah tohkit pyrshah ïa u Registrar bad Director ka IIPH kiba la kynnoh khlem nongrim ïa u DHS (MI) ka jylla u Dr Aman War hynrei ïa kane ruh ym shym la leh.
Ka MMSA ka dap ruh da ka jingsngew kyndit ban ïohi ba u Principal Secretary ka tnad Health and Family Welfare u Sampath Kumar u ïashah liang bad ki bor pynïaid ka IIPH ha ka jaka ba un ïada ïa u briew lajong ne sngap kaei kaba u DHS (MI) u don ban ong ne pynshai halor ka jingjia ba la jia ha ka 27 tarik Jymmang 2022 ha ka jaka ba don ka NEIGRIHMS mynshwa hajan Pasteur Institute, Lawmali. Ha ka shithi ba la phah da I President ka MMSA Dr Y Phira, la dep kyrpad ban thung jingtohkit halor ka jingkynnoh bym don nongrim jong ki nongpynïaid ka IIPH ïa u DHS (MI) kaba long tang ka jingkynnoh ban pynjah burom ïa u.
Ka MMSA ka dawa ruh ba dei ban pynkynriah mardor ïa ka IIPH na katei ka jaka namar ka la khapngiah palat ka ophis jong u Deputy Director ka Malaria.
Hynrei ka sorkar kam shym la shim khia “ Kumta kane ka jingpynnoh bad pynduh mynsiem ïa ki doktor kan ktah jur ïa ka rukom ai jingsumar hadien habud ruh ha ka jylla” ong ka MMSA.
Ka MMSA ka dawa ruh na ka sorkar ba kan bishar bniah biang ïa ka MoU ba la ïasoi da ka sorkar bad ka Public Health Foundation of India.
