24 kynta yn ïoh jingïarap ki khynnah klas 9-12 na ki nonghikai bad ka kabu ïa ki samla wad kam sorkar

Nongpoh, Rymphang 26: Ka long ka sngi kaba kmen ïa kiba bun ki nonghikai bad ki samla pule hadien ba ki bor district jong ka Ri-Bhoi kila shim da ka sienjam kaba khraw ban ïarap ïaki khynnah skul bad haka juh ka por ki khynnah kiba la pyndep ïa ka klas 12 kiba pynkhreh ban ïakhun ïa ki eksamin kam sorkar la ka long jong ka sorkar jylla ne sorkar pdeng.
Shuwa ban pyntreikam pura ïa utei u app, naka liang ka ophis u Deputy Commissioner ka Ri-Bhoi mynta ka sngi kala lum da ka jingïalang ha District Library ha Nongpoh bad ki Principal bad Headmaster jong ki Secondary bad Higher Secondary School ha Ri-Bhoi District, ban pynshai bad pyni ïaka rukom treikam jong u khamtam ban ïarap ïaki khynnah klas 9-12 kiba duna haki jingpule kiba lah pat ban ioh jingïarap ban pynjanai ïaka jabieng bad ka jingstad jong ki.
Ha kane ka sngi ka jingpynshai sha ki khlieh jong ki skul pule la sakhi ruh da ka jingdonlang u Abhilash Baranwal Deputy Commissioner ka Ri-Bhoi, u C Awasthi SDO Patharkhmah Civil Sub Division bad kiwei kiwei ki ophisar naka district.
Haba kren sha ki lad pathai khubor u Abhilash Baranwal u la pynshai ba ki don ar bynta ha utei u app bala mang kyrpang naka bynta ki samla pule ka Ri-Bhoi District, kawei naka bynta ki khynnah skul naduh klas 9-12 ba ki lah ban ioh jingïarap 24 kynta naduh ki notes, ki jingdonkam jong ki bad kan don ruh ka dashboard naka bynta ki principal bad ki bor district ba ki lah ban khmih kino ki khynnah kiba kiew shakhmat bad kiba duna bad dei lyngba katei ka rukom ki nonghikai ki lah pat ban pynjanai ïa kitei ki khynnah kiba duna namar ka thong hi ka long ban kyntiew lut ïaka jingstad bad ka bor pyrkhat jong baroh ki khynnah.
Ha kawei pat ka bynta utei u app un dei ruh naka bynta ki samla pule kiba la pyndep ïaka klas 12 bad kiba dang pynkhreh ban wad kam sorkar laka long ki kam ba lait haka sorkar jylla ne sorkar pdeng, ha kaba ki samla na Ri-Bhoi kim donkam ban siew eiei haba ki register bad ki wad jingtip lyngba utei u apps hadien ba ka bor district kala shim ïaka sienjam ban pynmih ïa utei u apps haka jingïatreilang bad ka FILO bad bei tyngka da ka NITI Aayog.
Ki samla ki lah ruh ban register ïalade lyngba ka link https://tinyurl.com/25c5rwpc bad khmih lynti ba kane ka ïarap shibun ïaki khynnah skul bad kumjuh de ki samla wad kam sorkar.