SHILLONG, Rymphang 19: Ka kynhun ki nongïalehkai Kickboxing jong ka jylla hapoh ka lama jong ka Meghalaya State Kickboxing Association (MSKA) ki la ïoh ban khur 23 tylli ki takma ha ka 5th India Open International Kickboxing Tournament ha nongbah Delhi.
ïa kane ka lympung la pynïaid da ka WAKO India Kickboxing Federation bad ka la sdang naduh 04 tarik haduh 08 tarik Rymphang, 2026. Ki 23 tylli ki takma ba ki nongïalehkai ka MSKA ki la ïoh ban khur ki kynthup ïa 7 tylli ki ksiar, 9 tylli rupa bad 7 tylli ki rnong.
Na ka liang ki kynthei ki la khur 10 tylli ki takma ba kynthup mar 4 tylli ki takma ksiar bad rupa, bad 2 tylli ki rnong, katba ki shynrang ki la jop 13 tylli ki takma ba kynthup 3 tylli ki ksiar, 5 tylli rupa bad 5 tylli rnong.
Ki la don san ngut ki International Kickboxers jong ka MSKA, u Babit Kharsahnoh, ka Daniella I W Mylliemngap, Medari Phylla Lyngdoh Niongbri, Ibadarishisha Mukhim bad ka Belldona Pakyntein ki la pynneh pynsah ïa ka burom jong ki da kaba khur takma ksiar bad rupa.
Ki hynñiew ngut ki nongjop takma ksiar ki don ha ka thup kyrdan (ranking list) bad kumta ki lah ban mihkhmat ïa ka India ha ki lympung International Kickboxing Tournaments bad kumjuh ruh ka World Cup.
Ki kynthei ba la jop takma ksiar ki long ka Belldona Pakyntein (K1 Rules -52kg senior), Daniella IW Mylliemngap (K1 Rules -60kg senior), Medariphylla L Nongbri (Low Kick -56kg senior) bad ka Joviality L Kynshi (K1 Rules -40kg junior). Katba na ka liang ki shynrang la khur da u Babit Kharsahnoh (K1 Rules -51kg senior), Solomon H Buongpui (K1 Rules -70kg senior) bad u Ialamjingshai L Mawlong (Low Kick -48kg junior).
Kiba la jop takma rupa na ka liang ki kynthei ki long ka: Ibadarishisha Mukhim (Low Kick -48kg senior), Ibadahunshisha Rani (Full Contact -65kg senior), Lanosha Marbaniang (Full Contact +70kg senior), Hazel Christinna Ripnar (K1 Rules -52kg senior). Na ki shynrang ki long u Dajied K Synjri (Kick Light bad Light Contact -47kg junior), Pynskhemlang Kshiar (Low Kick -51kg senior), Badonbok Mylliem Umlong (Low Kick -57kg senior) bad u Malvin L Marshillong (K1 Rules -57kg senior).
Kiba la khur takma rnong ki long: (Kynthei) ka Isapynbiang Lyngdoh (Light Contact bad ha ka Kick Light -28kg cadet); katba na ki shynrang u Ishwar Chettri (K1 Rules -75kg senior), Enboklang L Mawnai (Full Contact -57kg senior), Benvoleo Chyne (Musical Form -42kg junior), Aaron Odahiam Sungoh (Light Contact -42kg junior) bad u Samebaniar L Mawphlang (Point Fighting -21kg cadet).
