Shillong, Nailur 02: Ka kynhun ïalehkai jong ka jylla Meghalaya, ba la mihkhmat da ka Myngken Christian Higher Secondary School na Ri-Bhoi District, ka la sdang ïa ka jingïaidlynti jong ka ha ka U-17 boys’ Subroto Cup ha New Delhi da ka namjop kaba suk hadien ba ka la pynliem kput haduh 23-0 kol ïa ka Dadra & Nagar Haveli and Daman & Diu ha ka jingïalehkai kaba nyngkong kaba la long ha ka Lah Sngi U Blei.
Ha kane ka jingïalehkai ki la don haduh arngut kiba la khyrwit ar tylli ki hat-trick (6 kol) ba kynthup ïa u Alice (7 kol) bad u Mebanlamlynti (6 kol). Nangta u Banpliebok (3 kol) u la ïoh ban thep lai kol, katba u Pynshai u la thep ar kol, bad u Franky, Banganson, Bipiush, Andrew bad u Mebatskhem ki la ïoh ban pynkhihjar mar kawei.
Kumban shu kdew, ïa ka Meghalaya la mihkhmat da ka Myngken Christian Higher Secondary School kaba na Ri-Bhoi District ha kane ka lympung, hadien ba ki la ïohrah ïa ka state-level Subroto Cup ha u Naitung mynta u snem.
Lah ban kdew ruh ba ka Meghalaya ka la shah pynïakap ha ka Group F, bad kynthup ïa ka Chandigarh bad ka Bihar.
Da kane ka namjop, ka Meghalaya kan pynkhreh ban aireng sa ïa ka Chandigarh mynta ka sngi ha ka por 2:30 baje nohphai sngi.
