227 tylli la dep pyndait sah sa 200 tylli ki CCTV ban dang pyndait ha kylleng ka jylla

Shillong, Kyllalyngkot 15 : U Myntri Rangbah ka Jylla u Conrad K Sangma ula pynbna ba ka Sorkar ka la pyntrei shaid shaid ban pyndait ïa ki kor CCTV ha kylleng ka Jylla bad haduh mynta 227 tylli ki kor lah dep ban pyndait kum ka jingsdang.
“Nga tharai kumba 70-80 percent kila dep….ngin sa sdang sa ïa ka wat kaba ar ha kaba ngin sa pyndait sa 200 tylli” ong u Conrad haba ïakren bad ki nongthoh khubor ha ka sngi Palei.
U Conrad ula pyntip ruh ba ka Sorkar kala pynleit jingmut ban pyndait kor CCTV bad streetlights ha Jowai, Tura bad Shillong, ha kaba ïa ka project la khmih lynti ban pyndep hapoh ka shisnem.
“Kane kan dei ka kam ka ban ïaid shisnem lynter….kala ïaid sted bha mynta bad bun ki shnong kila dep ïoh ïa ka” ula bynrap.
Haba kylli halor ka jinglut ban pyndait kor CCTV, u Conrad ula pynpaw ba ka jingshngaiñ bad ka jingïada ki kham long kongsan.
U Myntri Rangbah ula kular ba ka Sorkar kan ïatreilang ryngkat ryngkat bad ki bor shnong kynthup ki Dorbar Shnong ha Shillong, ban pynthikna ïa ka jingpyntreikam thikna ïa ka project.