22 tarik mynta u bnai ka proseshon Maria ba kyrpang ha Mawlai Parish

Shillong, Jymmang : U MLA ka Mawlai u Bah PT Sawkmie hynne ka sngi u la ïalam ïa ki heh enjiniar ka tnat PWD bad PHE ha ka jingdon ryngkat ki nongïalam ka Balang Katholik Mawlai Parish, kynthup ïa ki rangbah bad ki longkmie ban jurip ïa ki surok bad ka um na ka bynta ka jingpynkhreh ïa ka Proseshon Maria kaba kham pher bad kham kyrpang ka ban long ha ka 22 tarik mynta u bnai.
Kane ka long ka proseshon kum shi bynta jong ka jingrakhe dap 100 snem ha rilum Khasi Jaiñtia bad ka jingdap 100 snem ka jingwan ki phadar Salesian ha ka thaiñ shatei Lammihngi.
Ha kane ka sngi ki la ïoh ruh ban ïakren na ka bynta ka jingpynbiang ïa ka um, ka surok bad ka jaka ïeng kali ha ka jingdon ryngkat u heh pulit Inspector na Mawlai PS.
Ha ba kren ha kane ka sngi na ka liang u secretary jong ka Seng Rangbah Katholik Mawlai Parish u Bah Stilin Dkhar u la pynpaw da ka ba ong nalor ka Shillong Diocese, ki la khot sngewbha ruh sa ar tylli ki Diocese ha kane ka proseshon ba kyrpang, kata ka Jowai bad Nongstoiñ. Kumta ki khmih lynti la kumno kumno kumno palat ïa ka 20,000 ngut ki paid riewngeit kin wan ban ïashim bytna ha kane ka proseshon Maria.
Na ka liang u Bah PT Sawkmie u la pynpaw ba u wan hi da la ka jong ka met ban khmih ba kiei kiei baroh kin bit kin biang ha ka ba ïa dei bad kane ka proseshon.Ha kajuh ka por u la kyntu ruh ïa ka PWD bad PHE ba kin shimkhia ban maramot bha khnang ba kan long ka ba khuid ba suba bad khnang ba ki paidbah ki ba wan ïashim bynta ha kane ka jingïaid proseshon kin lait na kino kino ki jingeh.
Shuh shuh na ka liang jong u MLA u la ong ruh ba kin pynlong biang ïa ka jingleit jurip bniah ha ka ba iadei bad ki jingpynkhreh pynkhrum shi sngi shuwa katei ka jingïaid proseshon khnang ba baroh kiei kiei kin long ki ba ïaid beit ïaid ryntih.