Shillong, Lber 21: Ka kyrtong jong ka Seng NPP na Shillong Parliamentary Constituency, ka Dr. Ampareen Lyngdoh kan thep kyrteng ha ka sngi thohdieng ha ka por 11 baje mynstep. Ïa kane la ïathuh da u State President ka NPP, u Bah Prestone Tynsong haba ïakren bad ki nongthoh khubor ha Shillong.
“Ngi la ïapynbeit bad i Kyrtong jong ka Seng ban thep kyrteng noh ha ka 22 tarik ha ka por 11 baje mynstep”, la ong u Bah Prestone Tynsong.
La sngewthuh ba ha kane ka jingleit thep kyrteng yn synran lang ruh da ki nongïalam ba hakhmat jong ka Party ryngkat ki nongkyrshan jong ka Party.
Lah ban kdew hangne ba ka Dr. Ampareen, ka la jop nyngkong eh ha ka elekshon haba ka la jop kum ka MLA jong ka Laitumkhrah ha u snem 2008 na ka Seng UDP. Hynrei hadien shi snem, ka la iehnoh nih ïa ka kam MLA bad ïakhun ïa ka elekshon shiteng samoi ban jop da ka Seng Congress. Shuwa ban ïakhun ïa ka elekshon shiteng samoi, ka la long ka Myntri hapoh ka sorkar ba ialam da ka Congress hadien ka jingsynshar President Rule ha katei ka snem.
Hadien kane ka la jop biang ïa ka elekshon na ka Congress ha ka snem 2013 bad 2018 bad ha u snem 2023 pat ka la jop na ka Seng NPP hadien ba ki MLA ka Congress ki la phet noh sha ka Seng NPP. Mynta la long ka Myntri jong ka sorkar MDA-2.
Na ka liang u kyrtong jong ka Congress, u Bah Vincent Pala, uba long u Sitting MP un thep kyrteng ha ka sngi nyngkong, kata ha ka 25 tarik mynta u bnai. U Bah Pala u la jop MP nyngkong eh ha ka snem 2009, ha kaba u la ïoh long ruh u Myntri Khynnah ha ka sorkar pdeng. Nangta u la jop biang ha u snem 204 bad 2019 na ka Congress hi.
Katba na ka liang u Kyrtong ka VPP, u Dr. Ricky AJ Syngkon pat, un thep kyrteng ha ka 26 tarik mynta u bnai ha ka por 11 baje mynstep, ha kaba kan don shuwa ka jingïalang ha ophis jong ka Seng ha Laitkor. Nangne kin sa mih lang ki nongïalam ka Seng, lait noh u Bah Ardent Miller Basaiawmoit, President u ban hap leit sha ka jingïalap elekshon ka Party ha Jaiñtia Hills ha katei ka sngi.
Ka Party ka bthah ïa ki paidbah nongkyrshan ban ïa mih lang ha katei ka sngi da kaba wan sha ophis jong ka Seng ha Laitkor, hynrei ki bym lah ban wan sha ophis ki lah ban ap hajan All India radio ban synran lang ïa u Kyrtong.
