Shillong, Lber, 25: U Myntri ka Sorkar Jylla uba khmih ïa ka tnat Social Welfare Bah Paul Lyngdoh ha ka sngi Baar u la pyllait paidbah ïa ka Sugamya Yatra ha ka jingïalang kaba la long ha Soso Tham Auditorium, Shillong. Ka jingthmu jong ka Sugamya Yatra ka long ban kyntiew ïa ki briew kiba don jingduna ha ki dkhot met ïa kaba la pynlong da ka ophis Commissioner for Person with Disabilities ryngkat ka jingïatreilang bad ka State Resource Centre on Disability Affairs (SRCDA), Shillong lem bad ka Composite Regional Centre, Shillong.
Ka Sugamya Yatra ka dei ka shi bynta bynta jong ka Sugamya Bharat Abhiyan (Accessible India Campaign) kaba la shimkhia da ka Ministry of Social Justice & Empowerment, Sorkar India.
Ha kane ka sngi la pynkup burom ruh ïa ki phra ngut ki briew kiba don jingduna ha ki dkhotmet kiba la ïoh jingkyrshan na ka PRIME na ka bynta ban seng kam lajong lyngba ka jingkyrshan jong ka ophis Commissioner for Persons with Disabilities, ka tnat Social Welfare, ka State Resource Center on Disability Affairs da ka jingïatreilang bad ka PRIME Meghalaya,.
Ka Deputy Commissioner for Persons with Disabilities Kong Bridget Warshong ka la pyntip ba kine ki phra ngut kiba la shah jied ki la ïoh jingkyrshan pisa na ka PRIME Meghalaya kaba kot baroh T. 22 lak.
Ki phra ngut ki nongsengkam lajong ki kynthup ïa ka Kong Larikyrpang Nongrum (Lari Cyber bad Stationery), Bah Ferdinand Lyngdoh (EKANBHA), Kong Donrisha Mawrie (rep syntiew), Bah Dispi Kharbuli (nongshoh nar), Bah Batskhem Kharkamni (trei kam dieng), Bah Bansuklang N. Sohlang (treikam nar), Kong Bandarisha Rynjah (suh jaiñ) bad u Bah George Eric Campbell Marbaniang (Electrician bad Wiring).
Haba kren ha kane ka sngi kum u kongsan u Bah Paul Lyngdoh u la pyntip ba ka jingïakren kaba seisoh kaba la long ha ka taiew ba ladep ha kaba la sakhi lang da u Myntri Rangbah ka Jylla u Conrad K. Sangma bad u Myntri ka Sorkar Pdeng uba khmih ïa ka tnat Social Justice and Empowerment u Virendra Kumar. Ha ka jingïakren, u Myntri ka Sorkar Pdeng u la pynthikna ïa ka Sorkar Meghalaya ba ïa ka Centre for Disability Sport ha Mawkhanu, New Shillong yn sas bei pisa da ka Ministry of Social Justice and Empowerment.
U Bah Paul u la pynpaw ruh ka jingkyrmen ba ka jylla shen kan sa sakhi ïa ki briew kiba duna dkhotmet kin sa ïoh ban ïashim bynta lang ha ka National Games 2027, ka ban sa pynlong da ka jylla Meghalaya.
Ka Kong Bridget Warshong ka la pyntip ba ka Sugamya Yatra ïa kaba la tip kum ka “Accessible Journey”, ka thmu ban kyntiew ïa ka jinglah bad ka jingpynrung lang ïa ki briew kiba don jingduna ha ki dkhotmet, ban pynsngewthuh bad ban weng ïa ki jingeh ha ki jaka paidbah. Kum shi bynta jong kane ka jingthmu, ki kynhun kin sa leit jngoh ïa ki ïing treikam bapher bapher bad ban ithuh ïa ki jingduna ha ka jinglah ban ïoh rung ki briew kiba duna dkhotmet.
Ïa ka Yatra yn sa pynlong da ka ophis Commissioner for Persons with Disabilities, ka tnat Social Welfare da kaba ïatreilang bad ka State Resource Center on Disability Affairs bad Composite Regional Center, Shillong, ryngkat bad ki riewshemphang, ki Engineer, bad Architect na ka tnat PWD (Buildings), PWD (Roads), Health Engineering Wing, State Sports Council, Water Resources bad Industries, , MeECL bad kiwei kiwei ki tnat.
Ïa ka Access Audit yn sa leh hi da ka Bethany Society, da kaba kynthup lang ïa ki NGOs, ki briewba duna dkhomet bad ki nongbatai ktien ba pyni da ki shymphriah kti.
Ha kane ka sngi la sakhi lang da u Commissioner for Persons with Disabilities ka Sorkar Meghalaya u Bah L. Kynjing, uba long ruh u CEO jong ka SRCDA, ka Joint Secretary jong ka tnat Social Welfare ka Kong Camelia Doreen Lyngwa, Dr. N.P. Laloo, MS Ortho, Project Director & State Coordinator, SRCDA.
